ქართული ოცნების 6 დეპუტატი მმართველ პარტიას ტოვებს და ექსპრემიერ გიორგი გახარიას უერთდება. "ოცნებიდან" მიდიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე. მათი თქმით, გადადიან გახარიას "პარტიის მშენებლობის ახალ ეტაპზე". ამის შესახებ მათ პარლამენტში გამართულ ბრიფინგზე განაცხადეს და დასძინეს, რომ საქმიანობას გააგრძელებენ, როგორ დამოუკიდებელი დეპუტატები.

"თითოეულმა თქვენგანმა კარგად იცის, რომ ჩვენ ვართ გიორგი გახარიას გუნდის წევრები, ვართ თანამოაზრეები და გვაერთიანებს საერთო ღირებულებები და ფასეულობები. ეს სიახლე არავისთვისაა, თუმცა ახალი ამბავი გახლავთ ის, რომ ჩვენ დღეიდან გიორგი გახარიასთან ერთად, ერთობლივი გადაწყვეტილებით, გადავდივართ პარტიის მშენებლობის ახალ ეტაპზე და ახალ ფაზაზე. შესაბამისად, ვტოვებთ ქართულ ოცნებას და პარლამენტში ამ ეტაპზე საქმიანობას გავაგრძელებთ, როგორც დამოუკიდებელი დეპუტატები", — განაცხადა გიორგი ხოჯევანიშვილმა.

მისივე თქმით, იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.

"ჩვენი ქვეყანა დღეს სერიოზული გამოწვევების წინაშე დგას, მოქალაქეებს უწევთ ყოველდღიურ რეჟიმში გამკლავება ისეთ პრობლემებთან, როგორიცაა პანდემია, ეკონომიკური კრიზისი, უმუშევრობა, სიდუხჭირე და სწორედ ეს პრობლემები აინტერესებს ჩვენს მოსახლეობას და არა პოლიტიკური პარტიების დაუსრულებელი დაპირისპირება და კინკლაობა. ჩვენ ამ პრობლემებს ვხედავთ, არ გვეშინია სიმართლის თქმის და პრობლემებისთვის თვალის გასწორების", — თქვა ხოჯევანიშვილმა.

მან აღნიშნა, რომ სამომავლო გეგმებზე დეტალურად გუნდის ლიდერთან ერთად მოგვიანებით ისაუბრებენ.

გიორგი გახარია პრემიერმინისტრის პოსტიდან 2020 წლის 18 თებერვალს, ნიკა მელიასთვის პატიმრობის შეფარდებიდან რამდენიმე საათში გადადგა. მან ამის მიზეზად სწორედ მელიას საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო. მელია უკვე ახალი პრემიერმინისტრის, ირაკლი ღარიბაშვილის მხარდაჭერის შემდეგ დააკავეს.

გადადგომიდან ერთ თვეში გახარიამ თქვა, რომ არსად წასვლას არ აპირებს და მეტიც, არც პოლიტიკიდან მიდის. ამის შემდეგ ვრცელდებოდა ინფორმაცია, რომ ქართული ოცნების დეპუტატების ნაწილი პარტიას დატოვებდა და გახარიას გუნდს შეუერთდებოდა.