ლელო მორიგი სამუშაო შეხვედრის ფარგლებში ევროკავშირის წარმომადგენლობის ოფისში იმყოფება. On.ge-ს პარტიაში დაუდასტურეს, რომ შეხვედრაზე იმყოფება ბადრი ჯაფარიძე. უცნობია, არის თუ არა იქ პარტიის მეორე ლიდერი, მამუკა ხაზარაძეც.

"ინფორმაციას გიდასტურებთ. ეს არის მორიგი სამუშაო შეხვედრა. თქვენ იცით, რომ ბადრი ჯაფარიძე და მამუკა ხაზარაძე უწყვეტ სამუშაო რეჟიმში იმყოფებიან საერთაშორისო ორგანიზაციებთან, მათ შორის, ევროკავშირთან, კარლ ჰარცელთან. იცით, რომ მთავარი გზავნილი ლელოსი არის, რომ შეთანხმება უნდა შედგეს იმისთვის, რომ დასრულდეს პოლიტიკური კრიზისი და მუშაობა მიმდინარეობს. დღეს მორიგი სამუშა შეხვედრაა და ამას გიდასტურებთ", — გვითხრეს პარტიაში.

მედიაში ვრცელდება ინფორმაცია, რომ ევროკავშირის წარმომადგენლობის ოფისში იმყოფება პარლამენტის თავმჯდომარე, არჩილ თალაკვაძეც. On.ge პარლამენტის პრესსამსახურს დაუკავშირდა, თუმცა გვითხრეს, რომ ინფორმაციას არ ფლობენ.

ქართული ოცნებისა და ოპოზიციის მორიგი მედიაცია კვლავ უშედეგოდ დასრულდა. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. შეხვედრის შემდეგ მხარეებმა ისაუბრეს, რომ იყო საკითხები, რაზეც თანხმდებოდნენ, მაგრამ ნაწილზე — ვერა. მაგალითად, ლელოს ლიდერმა, ბადრი ჯაფარიძემ განაცხადა, რომ ნაციონალური მოძრაობის ლიდერ ნიკა მელიასთან დაკავშირებით შემოთავაზებული იქნა გადაწყვეტილება, რომელიც სრულად პასუხობდა პრობლემის გადაჭრას, თუმცა ეს არ განმეორდა გიორგი რურუას შემთხვევაში.

დანიელსონი მხარეებთან შეხვედრამდე საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო. მიშელის წარმომადგენელი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.