ფორმულა თანამშრომლებზე თავდასხმას ტელევიზიაში მათ პროფესიულ საქმიანობას უკავშირებს. ტელეკომპანიაში აცხადებენ, რომ ეს არ იყო ჩვეულებრივი კრიმინალური შემთხვევა და მანქანიდან არც არაფერი არის წაღებული.

"თავდასხმის დროს ადგილი ჰქონდა გარკვეული სიტყვებისა და ტერმინების გამოყენებას, რომელიც პირდაპირ მიგვანიშნებს, რომ მის პროფესიულ საქმიანობას უკავშირდებოდა", — განაცხადა ტელევიზიის სპეციალურ ბრიფინგზე, გიორგი თარგამაძემ.

ფორმულას დირექტორის, ზუკა გუმბარიძის თქმით, ერთ-ერთ მძღოლ არჩილ ტიბუნაშვილს ღამის 3 საათზე, კომენდანტის საათის დროს დაესხნენ თავს. მეორე მძღოლის ვინაობა კი მისივე სურვილით, უსაფრთხოებიდან გამომდინარე არ დაასახელეს, თუმცა დირექტორმა აღნიშნა, რომ შესაბამის უწყების წარმომადგენლებს გამოძიებისთვის ინფორმაციას მიაწვდიან.

"მის მანქანას, რომელზეც ფორმულას ლოგოები და მიკროფონის ღრუბელია დამაგრებული, განხორციელდა ვანდალური აქტი. ჩამსხვრეულია ბევრი შუშა, რაც თავისთავად მიუთითებს, რომ ეს არ იყო ჩვეულებრივი კრიმინალური შემთხვევა. მანქანიდან არც არაფერი არის ამოღებული. ის არის დაზიანებული. ადგილზე მივიდა პატრული, მაგრამ ჯერ არ გვაქვს ინფორმაცია, რა ხდება გამოძიების მსვლელობის დროს.

მეორე ფაქტიც უკავშირდება ფორმულას მძღოლს, რომელიც არის ნაცემი. მას აღენიშნება ფიზიკური დაზიანებები.

სამწუხაროა, რომ ეს გრძელდება მას შემდეგ, რაც ჩვენს ჟურნალისტ ვახო სანაიაზე განხორციელდა კიდევ ერთი თავდასხმა და ეს არის გაგრძელება ქვეყანაში არსებული უკიდურესი პოლარიზაციისა და ძალადობრივი ფონის მიზეზია, რომელიც, ჩვენი აზრით, ხშირ შემთხვევაში იმ უპასუხიმგებლო რიტორიკას უკავშირდება, რომელიც მმართველ პარტიას აქვს", — განაცხადა გუმბარიძემ ტელეკომპანიის სპეციალურ ბრიფინგზე.

მან სახალხო დამცველ ნინო ლომჯარიასა და დიპლომატიური კორპუსს მედიაზე გახშირებული ძალადობის ფაქტებით დაინტერესებისკენ მოუწოდა.

ეს არ არის პირველი შემთხვევა, როცა ფორმულას თანამშრომლებს თავს ესხმიან. 25 თებერვალს თავს დაესხნენ ჟურნალისტ ვახო სანაიას, რომელსაც ტვინის შერყევა დაუდასტურდა. სანაია ამბობს, რომ თავდამსხმელებისგან პირდაპირი აგრესია იგრძნობოდა ტელევიზიების, განსაკუთრებით კი, კრიტიკული მედიის წარმომადგენლების მიმართ.