საქართველოს პრეზიდენტმა, სალომე ზურაბიშვილმა განაცხადა, რომ ნამახვანჰესის საკითხზე საჭიროა ორივე მხარის, მომხრეებისა და მოწინააღდეგეების მოსაზრებების გათვალისიწნება და შეჯერება. მისი თქმით, სასურველია, შეიქმნას სახელმწიფო კომისია, სადაც ეკონომისტები, ბუნებისდამცველები, ადგილობრივი და უცხოელი ექსპერტები ერთად განიხილავენ არამხოლოდ ამ კონკრეტული ჰესის ბედს, არამედ მომავალ გეგმებს ენერგეტიკის მიმართულებით.

მისივე თქმით, საჭიროა რომ იყოს მაქსიმალური საჯაროობა და ის მზად არის, რომ დაუთმოს პრეზიდენტის სასახლის პლატფორმა ამ განხილვებს.

"ერთის მხრივ, ის საზოგადოება, რომლის წუხილიც ძალიან კარგად მესმის და ვუთანაგრძნობ, ითხოვს ჩვენი ბუნებრივი რესურსებისა და მიწის დაცვას უხეში ჩარევისა და ზემოქმედებისაგან. ადგილობრივი მოსახლეობა და არამხოლოდ ის, აპელირებს იმ საფრთხეებზე, რომელიც ემუქრება ზოგადად ეკოლოგიას, რეგიონში სოფლის მეურნეობას, მეღვინეობის და ტურიზმის პოტენციალს.

მეორე მხრივ კი, ის ვინც, ინვესტიციების მოზიდვას, ეკონომიკის გაცოცხლებასა და ენერგოდამოუკიდებლობას ანიჭებს უპირატესობას და ადამიანის სიდუხჭირიდან თავის დაღწევაზე აპელირებს.

ორივე მხარეს აქვს ძლიერი არგუმენტები და უალტერნატივოდ მიმაჩნია ორივე მოსაზრების გათვალისწინება და შეჯერება", — განაცხადა პრეზიდენტმა პარლამენტში სიტყუვით გამოსვლისას.