დაავადებათა კონტროლის ცენტრის ხელმძღვანელმა, ამირან გამყრელიძემ არ გამორიცხა, რომ ჩინური ვაქცინა სინოფარმით აიცრას. ამის შესახებ მან TV პირველის ეთერში ისაუბრა.

ამირან გამყრელიძეს კორონავირუსი დეკემბერში დაუდასტურა. პროტოკოლის თანახმად, კი დადასტურებიდან აცრამდე 120 დღე უნდა გავიდეს.

"აპრილის ბოლოს მომიწევს და აუცილებლად ავიცრები [...] შეიძლება ავიცრა სწორედ ჩინური ვაქცინით. არ არის გამორიცხული", — აღნიშნა მან.

საქართველოში ვაქცინაცია 15 მარტს დაიწყო. ქვეყანაში AstraZeneca-სა და Pfizer-ის ვაქცინებია. 3 აპრილს კი ბაზარზე ჩინური სინოფარმის 100 ათასი დოზა შემოვიდა, რომელიც ჯანდაცვის მსოფლიო ორგანიზაციიდან ავტორიზაციას ელოდება. ჯანდაცვის სამინისტროში აცხადებენ, რომ ჯანმოს მიერ ვაქცინის რეგისტრაციის შემდეგ, ის მოქალაქეებისთვისაც იქნება ხელმისაწვდომი.

ვაქცინაციის პროცესში ჩართვა შეუძლია ნებისმიერ მოქალაქეს 55 წლის ზემოთ, ასევე, სამედიცინო პერსონალს, დიალიზის საჭიროების მქონე პირებსა და ორგანოგადანერგილებს.

ვაქცინისთვის ჩაწერა და პრეპარატის არჩევა შესაძლებელია პლატფორმაზე Booking.moh.gov.ge.