პრემიერმინისტრ ღარიბაშვილის განცხადებით, ქართული ოცნების ხელისუფლებამ ნატოსთან თანამშრომლობა, რომელიც ეფუძნება პრინციპს "მეტი ნატო საქართველოში და მეტი საქართველო ნატოში", კიდევ უფრო გააღრმავა. ამის შესახებ ღარიბაშვილმა Facebook-ზე, ნატოს დაარსების დღესთან დაკავშირებით დაწერა.

"ნატო-ში გაწევრიანებისკენ სწრაფვა — საქართველოს საგარეო და უსაფრთხოების პოლიტიკის მთავარი პრიორიტეტი — ფართო საზოგადოებრივ და პოლიტიკურ კონსენსუსს ეფუძნება, რაც კონსტიტუციაშიც არის ასახული. ალიანსთან თანამშრომლობით საქართველომ უდიდეს პროგრესს მიაღწია დემოკრატიის განვითარებისა და სამხედრო ინფრასტრუქტურის სრულყოფის მიმართულებებით. ჩვენმა ხელისუფლებამ ეს თანამშრომლობა, დაფუძნებული პრინციპზე — "მეტი ნატო საქართველოში და მეტი საქართველო ნატოში", კიდევ უფრო გააღრმავა და გააძლიერა", — წერს ღარიბაშვილი.

მისივე თქმით, დღეს საქართველო ნატოს ერთ-ერთი ყველაზე ახლო, საიმედო პარტნიორია და ჩვენს სამხედროებს პროფესიონალიზმითა და თავდადებით დიდი წვლილი შეაქვთ სამშვიდობო ოპერაციებში, იქნება ეს ავღანეთში თუ ცენტრალური აფრიკის რესპუბლიკასა და მალიში.

"ჩვენ მზად ვართ სრულად გავიზიაროთ კოლექტიური თავდაცვის პასუხისმგებლობა. მე უკვე განვაცხადე ნატო-ს გენერალურ მდივან იენს სტოლტენბერგთან შეხვედრისას, რომ საქართველოს ნატოში დაწინაურების დრო დადგა. ღრმად გვწამს, რომ შავი ზღვისპირეთის მიმართულებით ალიანსის გაფართოება აუცილებელი პირობაა ევროპული და მსოფლიო უსაფრთხოებისთვის; რომ ნატოსაც ისევე სჭირდება საქართველო, როგორც ჩვენ გვჭირდება იგი", — ამბობს ღარიბაშვილი.