ორგანიზაცია Animal Project 4 აპრილს, ცხოველთა დაცვის საერთაშორისო დღის აღსანიშნავად, ორბელიანის მოედანზე ღონისძიებას გამართავს. აღნიშნული პროექტი მიზნად საზოგადოების ცნობიერების ამაღლებასა და მიუსაფრების პრობლემებში მათ უფრო მეტ ჩართულობას ისახავს.

"კინოლოგის რჩევები, ცხოველთან ურთიერთობის წესები და მათი ქცევების ამოცნობა, საბავშვო გასართობი და შემეცნებითი კუთხე, ქუჩიდან აყვანილი ცხოველების ფოტო-გამოფენა და ბევრი საინტერესო პროექტის წარდგენა — ეს იმ აქტივობების მცირე ჩამონათვალია, რომლებიც სტუმრებს 4 აპრილს, ორბელიანის მოედანზე ელოდებათ. მხატვარი თინა ჩერტოვა ბავშვებს ცხოველებისთვის აწყობილი სახლების მოხატვაში დაეხმარება, Dog Organization Georgia კი მათ ლეკვებთან კომუნიკაციას ასწავლის. ივენთის ფარგლებში, ვეცდებით ლეკვებს მზრუნველი პატრონებიც ვუპოვოთ. ეს იქნება ძალიან პოზიტიური, სახალისო და განსხვავებული დღეობა", — აცხადებენ პროექტის ორგანიზატორები.

ღონისძიების სივრცე რამდენიმე ზონად დაიყოფა და თითოეული მათგანი სხვადასხვა პროექტსა თუ აქტივობას დაეთმობა. ამავდროულად, სტუმრებს შესაძლებლობა ექნებათ მიირთვან ქართული კვების ბრენდების უგემრიელესი სამზარეულო, ისიამოვნონ მსუბუქი სასმელით და თემატური სუვენირებიც შეიძინონ. ივენთის შესაბამის მუსიკალურ განწყობას კი Tomma და გიო შენგელია შექმნიან.

ორგანიზატორები იმედოვნებენ, რომ აღნიშნული პროექტი, საზოგადოების დამოკიდებულებაზე მიუსაფარი ცხოველების მიმართ, დადებით გავლენას მოახდენს. მოსახლეობის მეტი ჩართულობა გადამწყვეტად მნიშვნელოვანია ამ კომპლექსური პრობლემის აღმოსაფხვრელად.