უწყებათშორისი საკოორდინაციო საბჭოს გადაწყვეტილებით, კასპის მუნიციპალიტეტის სოფლებში იგოეთში, სამთავისსა და ქვემო ჭალაში პოლიციის სპეციალური საკონტროლო პუნქტები მოეწყო.

შინაგან საქმეთა სამინისტროს ცნობით, აღნიშნული გადაწყვეტილება Covid-19-ის გავრცელების პრევენციისა და მოქალაქეთა აქტიური მონიტორინგის მიზნით მიიღეს. აღნიშნული სოფლების ტერიტორიაზე შემსვლელ და გამომსვლელ მოქალაქეებს ადგილზე თერმოსკრინინგი უტარდებათ, ხოლო საჭიროების შემთხვევაში — ტესტირება.

შიდა ქართლის რეგიონის სამ სოფელსა და კასპის მუნიციპალიტეტის სხვა სოფლებში შესვლა-გამოსვლა არ იზღუდება და სხვა მკაცრი საკარანტინო შეზღუდვები არ წესდება.

შსს მოქალაქეებს მაღალი საზოგადოებრივი პასუხისმგებლობის გამოჩენისკენ მოუწოდებს. მათივე თქმით, პოლიციის თანამშრომლები საზოგადოებრივი წესრიგისა და უსაფრთხოების დასაცავად სოფელში ინტენსიურად პატრულირებენ.