საქართველოს პარლამენტის თავმჯდომარის, არჩილ თალაკვაძის განცხადებით, ამერიკის შეერთებული შტატების სახელმწიფო დეპარტამენტის ანგარიშები ზოგადად, ბუნებით, ტრადიციებით არის კრიტიკული. ამის შესახებ მან რუსთავი 2-ის ეთერში განაცხადა.

"აშშ-ს სახელმწიფო დეპარტამენტის ანგარიშების სერია ადამიანის უფლებებზე ქვეყნდება პერიოდულად, ყველა ქვეყანასთან მიმართებაში, ყოველწლიურად საქართველოს შეფასებაც კეთდება ადამიანის უფლებათა დაცვის თვალსაზრისით. უნდა გითხრათ, რომ თვითონ ამ ანგარიშის ბუნება, ანუ ტრადიცია არის ის, რომ ეს ანგარიში ყველა ქვეყანასთან, მათ შორის, საქართველოსთან მიმართებაშიც, გახლავთ კრიტიკული. ეს ანგარიში ემსახურება იმას, რომ პარტნიორ და მეგობარ მთავრობებს აშშ ეუბნება დაკვირვების შესახებ, თუ რა პრობლემებია და თავისთავად, მე მინდა მადლობა გადავუხადო ყველა იმ ადამიანს, ჩვენს ამერიკელ მეგობრებს, ვინც მუშაობდა ამ ანგარიშზე და შეკრიბა ეს ინფორმაცია სხვადასხვა წყაროებიდან", — განაცხადა მან.

აშშ-ს სახელმწიფო დეპარტამენტის ანგარიშში, სადაც საქართველოში უფლებრივ მდგომარეობაზეა საუბარი, ქვეყნის სასამართლო სისტემა არის შეფასებული. დოკუმენტში ნათქვამია, რომ მიუხედავად იმისა, რომ კონსტიტუცია და კანონი ითვალისწინებს სასამართლო სისტემის დამოუკიდებლობას, კვლავ იკვეთება სასამართლოს დამოუკიდებლობასა და მიუკერძოებლობაში ჩარევის ნიშნები.

ანგარიშში მოყვანილია არასამთავრობო ორგანიზაციების 2019 წლის განცხადება, რომლის თანახმად პოლიტიკურად მოტივირებული სისხლისსამართლებრივი დევნა გაზრდილია. მაგალითის სახით მოყვანილია თიბისი ბანკის დამფუძნებლების, მამუკა ხაზარაძისა და ბადრი ჯაფარიძის წინააღმდეგ არსებული გამოძიება, მთავარი არხის გენერალური დირექტორის, ნიკა გვარამიასა და TV პირველის დამფუძნებლის მამის, ავთანდილ წერეთლის საქმეები. ამასთან, 20 ივნისს ანტისაოკუპაციო აქციებზე მონაწილე პირების დაკავებები, რომელთა შორის იყო ირაკლი ოქრუაშვილიც.