რამდენიმე წლის წინ 16 წლის მაიან სეგალს კარტის თამაშისას კითხვა გაუჩნდა: რატომ არის დედოფალი მეფეზე სუსტი? მაიანის მამას ამ კითხვაზე პასუხი არ აღმოაჩნდა. ამის შემდეგ მამა-შვილმა გენდერულ საკითხებზე მსჯელობა აქტიურად დაიწყო. სწორედ ასე შეიქმნა ახალი სათამაშო კარტი, სახელად Queeng, რომელიც გენდერული თანასწორობისა და მრავალფეროვნების იდეას ემყარება.

Queeng-ის პირველ ვერსიაში, რომელიც 3 წლის წინ გამოვიდა, მეფესა და დედოფალს თანაბარი ძალა ჰქონდათ. სეგალმა 4 ე.წ. "ვალეტიდან" 2 პრინცესად აქცია და ქალი ჯოკერიც შექმნა. თამაშმა საზოგადოების ყურადღება მალევე მიიპყრო და შემქმნელებმა 50 000-ზე მეტი შეკვრა გაყიდეს. მიუხედავად პოპულარობისა, საზოგადოების ნაწილი მიიჩნევდა, რომ კარტი საკმარისად ინკლუზიური არ იყო.

"მივხვდი, რომ კარტი ეთნიკურ მრავალფეროვნებას არ გამოხატავდა, თითქოს, ეს საერთოდ არც არსებობს. მსგავსი მიდგომა სრულად არ წარმოადგენს მსოფლიოში მცხოვრებ ადამიანებს. თუ ჩვენ ვაპირებთ, რომ ბავშვებს კარტი სათამაშოდ მივცეთ, რატომ არ გვინდა, რომ მათ სამყაროს ზუსტი სურათი დაინახონ?" — ამბობს მაიან სეგალი.

ფოტო: Indiegogo.com

მაიან სეგალმა კრიტიკოსთა უკუკავშირი გაითვალისწინა და Queeng-ის ახალი ვერსია გამოუშვა, რომელიც, გენდერული თანასწორობის გარდა, ეთნიკურ და რასობრივ მრავალფეროვნების იდეასაც ითვალისწინებს. შედეგად, კარტში სხვადასხვა კანის ფერისა და სახის ნაკვთების მქონე პერსონაჟებია წარმოდგენილი. დამატებით, სეგალმა კარტის შეკვრები მემარჯვენეებისა და ცაციებისთვისაც შექმნა.