დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ვაქცინაციის პროცესი ისე არ მიდის, როგორც პროგნოზირებდნენ, მაგრამ ამბობს, რომ 14 აპრილამდე, დაახლოებით, 14 000 ვიზიტია აცრაზე დაჯავშნილი.

"სამწუხაროდ, პროცესი ისე არ მიდის, როგორც სასურველია. ჩვენ სხვას ვპროგნოზირებდით. ძალიან სერიოზული ეფექტი პროცესის შენელებაზე იქონია იმ ძალიან ტრაგიკულმა ფაქტმა, რომელიც გასულ კვირას მოხდა ჩვენს ქვეყანაში. მანამდე ყოველდღიურად 1 300-1 400 აცრაზე ავდიოდით იმ 29 დაწესებულებაში, რომლითაც დავიწყეთ, და შემდეგ ეს ჩამოვარდა. ყოველდღიურად გვაქვს 100-120 აცრა", — განაცხადა გამყრელიძემ TV პირველთან.

მისივე თქმით, დღემდე 4 924 ადამიანია აცრილი, რაც ცოტაა.

"რა თქმა უნდა, ცოტაა, მაგრამ პატარა იმედი არის ის, რომ მომავალი 2 კვირისთვის, ანუ 14 აპრილამდე უკვე დაჯავშნილია, დაახლოებით, 14 000 აცრა, ვიზიტი, როგორც სამედიცინო პერსონალის, ისე 65 წელს ზემოთ ასაკის მოქალაქეების. აქედან 10 700-მდე გახლავთ Pfizer-ზე, და დაახლოებით 3 263 AstraZeneca-ზე. ეს მოთხოვნა თანდათან, როგორც გვაქვს ინფორმაცია, იმატებს", — თქვა გამყრელიძემ.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ვაქცინაციის პროცესში 65 წელს ზევით მოქალაქეები 25 მარტიდან ჩაერთვნენ.

მინისტრის მოადგილე, თამარ გაბუნიამ არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.