პრემიერმინისტრმა ირაკლი ღარიბაშვილმა განაცხადა, რომ ოპოზიციის მიერ აქციების 2 თვის შემდეგ დაანონსება იმაზე მიუთითებს, რომ მათ მიერ დაანონსებულ აქციებზე საკუთარი მხარდამჭერებიც აღარ დადიან. ღარიბაშვილის თქმით, ოპონენტები ძალიან მძიმე, კატასტროფულ მდგომარეობაში არიან.

"დამისახელეთ ნებისმიერი ქვეყანა, სადაც ოპოზიცია აანონსებს აქციას 2 თვის შემდეგ. ეს რაზე მიუთითებს, რომ საკუთარი მხარდამჭერებიც აღარ დადიან მათ მიერ დაანონსებულ აქციებზე. ეს კიდევ ერთხელ მიანიშნებს იმაზე, რომ ოპოზიცია არის სრულ გაუგებრობაში. ძალიან მძიმე, კატასტროფულ მდგომარეობაში არიან. მე ვგულისხმობ რადიკალურ, სააკაშვილის ფრთას და ზოგადად, მათ რადიკალურ ქმედებებს", — განაცხადა ღარიბაშვილმა.

20 მარტს ოპოზიციამ საკუთარი სამოქმედო გეგმა დააანონსა. ნაციონალური მოძრაობის ერთ-ერთმა წევრმა, ზაალ უდუმაშვილმა თქვა, რომ ისინი მუშაობის "საგანგებო რეჟიმზე" გადადიან. მისი განცხადებით, აპირებენ ქალაქებსა და სოფლებში ჩასვლას, რათა დაარწმუნონ მოსახლეობა, "რომ ბრძოლას აქვს აზრი". ამასთან, უდუმაშვილი აღნიშნავს, რომ ჩატარდება არაერთი აქცია, მათ შორის, 15 მაისს დიდი აქცია გაიმართება თბილისში.