პრემიერმინისტრი, ირაკლი ღარიბაშვილი მადლობას უხდის ამერიკის შეერთებული შტატების სენატსა და სახელმწიფო დეპარტამენტს "ობიექტურობისა და სამართლიანი შეფასებისთვის". ასე ეხმაურება იგი საქართველოს შესახებ სენატის მოსმენას.

"პირველ რიგში, მინდა მადლობა გადავუხადო ამერიკის შეერთებული შტატების სენატს და სახელმწიფო დეპარტამენტს, კონკრეტულად, ბატონ ჯორჯ კენტს, გაკეთებული შეფასებებისთვის, სამართლიანი შეფასებებისთვის და ობიექტურობისთვის. აღნიშნული მოსმენა და ის შეფასებები ცხადყოფს, რომ აშშ-სთვის საქართველო არის ერთ-ერთი ყველაზე მნიშვნელოვანი პარტნიორი ჩვენს რეგიონში. ასევე, მინდა ვთქვა, რომ ყოველგვარ სპეკულაციებს წერტილი დაესვა აღნიშნული განცხადებებით", — თქვა მან.

23 მარტს სენატის საგარეო კომიტეტის სხდომაზე საქართველოში დემოკრატიის მდგომარეობის შესახებ მოსმენა გაიმართა. სენატორებმა საქართველოში არსებული პოლიტიკური კრიზისი შეაფასეს. სენატორმა ჯიმ რიშმა სენატის საგარეო კომიტეტის სხდომაზე განაცხადა, რომ საქართველო ახლა კრიტიკულ მომენტშია. მისივე თქმით, თუ დემოკრატიამ ახლა არ იმუშავა, ქვეყანა ევროატლანტიკურ სტრუქტურებში გაწევრიანების შანსს დაკარგავს.

განცხადებები შეეხო ნაციონალური მოძრაობის ლიდერის, ნიკა მელიას დაპატიმრებასაც. ამერიკის შეერთებული შტატების სახელმწიფო მდივნის მეორე მოადგილემ, ჯორჯ კენტმა სენატის საგარეო კომიტეტის სხდომაზე განაცხადა, რომ საქართველოში ოპოზიციური პარტიის ლიდერის, ნიკა მელიას დაკავება ქართული დემოკრატიისთვის უკან გადადგმული ნაბიჯი იყო.

საბოლოოდ, ამერიკის შეერთებული შტატების სენატში საქართველოში არსებულ პოლიტიკურ კრიზისზე რეზოლუციის მიღების შესახებ განაცხადეს. რეზოლუციის მიღების ინიციატივა სენატორმა როს ჯონსონმა წამოაყენა. ჯონსონის თქმით, ეს მხარეებისთვის მნიშვნელოვანი სიგნალი იქნება.