თავდაცვის მინისტრის, ჯუანშერ ბურჭულაძე მისი მოადგილის, დავით სუჯაშვილის ფეისბქგვერდზე გამოქვეყნებულ ფოტოსთან დაკავშირებით აცხადებს, რომ გამოცდილების გათვალისწინებით სუჯაშვილს ეს შეცდომა არ უნდა მოსვლოდა, თუმცა მოხდა.

"არ მგონია ეს ვინმესთვის სასიამოვნო ინფორმაცია ყოფილიყო... ბატონი დავითის წვლილი ჩვენს შედეგებში, მათ შორის რუსეთის აგრეიის წინააღმდეგ არის უზარმაზარი. თვითონ განმარტა, რომ მისი თანაშემწის შეცდომაა. ის არის მძიმე მდგომარეობაში და თხოვა საზოგადოებას, რომ აღარ განევრცოთ აღნიშნული თემა, მაგრამ, სამწუხაროდ, ხდება ხოლმე... მისი გამოცდილების გათვალისწინებით ეს შეცდომა არ უნდა მოსვლოდა, თუმცა მოხდა", — განაცხადა ბურჭულაძემ დღის კურიერში.

21 მარტს თავდაცვის მინისტრის მოადგილემ ქართველ მესაზღვრეებს პროფესიული დღე რუსი სამხედროს ფოტოთი მიულოცა. დავით სუჯაშვილი აცხადებს, რომ მის ფეისბუქგვერდზე გამოქვეყნებული რუსი სამხედროს ფოტო ადმინისრატორის მიერ დაშვებული შეცდომაა. თუმცა, სუჯაშვილი აღნიშნავს, რომ მისი სახელით გამოქვეყნებულ მასალაზე პასუხისმგებელი თავადაა და საზოგადოებას ბოდიშს უხდის.

ოპოზიციის ლიდერები აცხადებენ, რომ ეს შეცდომა ერის შეურაცხყოფაა და სუჯაშვილმა თანამდებობა უნდა დატოვოს. მმართველ გუნდში კი ამას სამწუხარო შეცდომად აფასებენ.