პარლამენტის პირველი ვიცე-სპიკერი, გია ვოლსკი სუჯაშვილის ფეისბქგვერდზე გამოქვეყნებულ ფოტოსთან დაკავშირებით აცხადებს, რომ კონცენტრაცია საზოგადოებას იმაზე უნდა მოახდინოს, რაც პოლიტიკურ მიმართულებასა და სტრატეგიას ასახავს, ხოლო ეს ამბავი სამწუხარო შეცდომაა.

"უნდა შეხედო მთავარს, ჯარში რა ხდება, რამდენად უკეთესია ჩვენი ჯარისკაცების მომზადება და როგორია თანამშრომლობის ხარისხი იმ სტრუქტურებთან, რომელიც სწორედაც რომ ჩვენს პოლიტიკურ მიმართულებას და სტრატეგიას ასახავს. ამას ვამბობ, თორემ ის, ალბათ, სამწუხარო შეცდომაა, თუკი ასეთი მოხდა", — განაცხადა ვოლსკიმ.

21 მარტს თავდაცვის მინისტრის მოადგილემ ქართველ მესაზღვრეებს პროფესიული დღე რუსი სამხედროს ფოტოთი მიულოცა. დავით სუჯაშვილი აცხადებს, რომ მის ფეისბუქგვერდზე გამოქვეყნებული რუსი სამხედროს ფოტო ადმინისრატორის მიერ დაშვებული შეცდომაა. თუმცა, სუჯაშვილი აღნიშნავს, რომ მისი სახელით გამოქვეყნებულ მასალაზე პასუხისმგებელი თავადაა და საზოგადოებას ბოდიშს უხდის.

ამასთან, მითების დეტექტორმა გაარკვია, რომ ფოტო, რომლითაც თავდაცვის მინისტრის მოადგილემ მესაზღვრეებს პროფესიული დღე მიულოცა, ოკუპირებული ცხინვალიდანაა.