თავდაცვის მინისტრის მოადგილე, დავით სუჯაშვილი აცხადებს, რომ მის ფეისბუქგვერდზე გამოქვეყნებული რუსი სამხედროს ფოტო ადმინისრატორის მიერ დაშვებული შეცდომაა. თუმცა, სუჯაშვილი აღნიშნავს, რომ მისი სახელით გამოქვეყნებულ მასალაზე პასუხისმგებელი თავადაა და საზოგადოებას ბოდიშს უხდის.

"საიდუმლო არაა რომ facebook -ის ოფიციალურ გვერდს თავად არ ვმართავ, თუმცა თავად ვარ პასუხისმგებელი ყველა გამოქვეყნებულ მასალაზე და მათ შინაარსზე. გვერდის ადმინისტრატორმა გაუფრთხილებლობით მძიმე შეცდომა დაუშვა და მთელს საზოგადოებას ვუხდი გულწრფელ ბოდიშს ამისთვის.

სამწუხაროდ, უკვე დაიწყო თემით სპეკულირება. რუსეთი რომ ოკუპანტია და მტერი ეს არც სადავოა და არც სადისკუსიო", — წერს სუჯაშვილი.

თავდაცვის მინისტრის მოადგილემ ქართველ მესაზღვრეებს პროფესიული დღე რუსი სამხედროს ფოტოთი მიულოცა. ამის შესახებ ინფორმაციას და პოსტის სქრინს ფორმულა ავრცელებს.

ფოტო: კადრი დავითსუჯაშვილის ფეისბუქგვერდიდან/ფორმულა

ფორმულას ინფორმაციითვე, მას შემდეგ, რაც სუჯაშვილს კომენტარებში მიუთითეს, რომ ფოტოზე რუსი სამხედრო იყო გამოსახული, მან პოსტი საერთოდ წაშალა.