ლელოს ერთ-ერთი ლიდერის, ბადრი ჯაფარიძის განცხადებით, ყოფილი პრემიერმინისტრი, გიორგი გახარია არასდროს ყოფილა დამოუკიდებელი პოლიტიკური ფიგურა და ვერ იქნება. ასე ეხმაურება იგი თანამდებობის დატოვებიდან გახარიას პირველ საჯარო კომენტარს.

"გახარია არასდროს არ ყოფილა დამოუკიდებელი პოლიტიკური ფიგურა და ვერ იქნება დამოუკიდებელი პოლიტიკური ფიგურა, შესაბამისად, მას ბევრ კითხვაზე აქვს პასუხი გასაცემი საზოგადოებისთვის, სანამ იფიქრეს პოლიტიკაში დაბრუნებაზე", — თქვა მან.

პრემიერმინისტრობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიას გადადგომამდე ხმები მანამდეც ვრცელდებოდა, თუმცა გადადგომამდე 6 დღით ადრე მან განაცხადა, რომ არსად მიდის და ჯერჯერობით "მოდის".