პოლიტიკური მოძრაობა დროას ლიდერმა, ელენე ხოშტარიამ და ლელო-ს
ერთ-ერთი ლიდერმა, საბა ბუაძემ ერთობლივი ბრიფინგზე ცესკოს სხდომასა და საოლქო კომისიების წევრების დანიშვნას უნდობლობა გამოუცხადეს. მათი თქმით, საოლქო კომისიების ხელმძღვანელებად ქართული ოცნებისთვის მისაღებ ადამიანებს დანიშნავენ და ცესკოს მაღალჩინოსნები ანაზღაურებას გაიზრდიან.

ელენე ხოშტარია აცხადებს, რომ ცენტრალური საარჩევნო კომისიის მდივანი, გიორგი ჯავახიშვილი 2020 წლის არჩევნების ერთ-ერთი მთავარი გამყალბებელია. ხოშტარიას თქმით, გიორგი ჯავახიშვილი საკუთარი კლანის მეშვეობით რეალურად მართავს ცესკოს.

"სწორედ ეს ადამიანი აწარმოებს არჩევნების ე.წ. შავ მონიტორინგს. არჩევნების დღეს ჯავახიშვილი სუსის და ქართული ოცნების წარმომადგენლებთან ერთად იმყოფება პარტიის ცენტრალურ ოფისში, სხვენში, სადაც უბნებიდან იღებს შედეგებს და მხოლოდ მისი თანხმობით ხდება ამ შედეგების ატვირთვა ცესკოს სისტემაში. სწორედ ეს გახდა საპარლამენტო არჩევნებზე შედეგების დაგვიანებით გამოქვეყნების მიზეზი. მეორე ადგილი, სადაც ცესკოს დე-ფაქტო მმართველობა იკრიბება, გაზის და ნავთობის კორპორაციაა", — განაცხადა ხოშტარიამ.

საბა ბუაძემ ყურადღება ცესკოს სისტემაში კორუფციულ ინტერესებსა და ნეპოტიზმზე გაამახვილა. ლელოს ერთ-ერთი ლიდერი ამბობს, რომ სწორედ ამ მეთოდებით იმართება და კონტროლდება ცესკო ქართული ოცნების მიერ. საბა ბუაძის თქმით, მსგავსი კორუფციული სქემის კარგი მაგალითია სსიპ საარჩევნო სისტემების განვითარების, რეფორმებისა და სწავლების ცენტრი, ცესკოს სიპი, რომელიც არასამთავრობო ორგანიზაციებზე გასცემს გრანტებს.

პოლიტიკური პარტიების ბრალდების თაობაზე On.ge ცესკოს დაუკავშირდა, სადაც გვითხრეს, რომ საპასუხო კომენტარის შემთხვევაში დაგვიკავშირდებიან.