ათსაათიანი მოლაპარაკებების შემდეგ, რომელიც უშედეგოდ დასრულდა ქართული ოცნების თავმჯდომარე, ირაკლი კობახიძე პასუხისმგებლობას ოპოზიციას აკისრებს. მისი თქმით, მათ არ სურდათ შეთანხმების მიღწევა.

"სამწუხაროდ, გამართლდა ის, რაზეც ვსაუბრობდით. როგორც ჩანს, ოპოზიციისთვის იყო თვითმიზანი შეთანხმების არმიღწევა. ეს გამოიხატა იმაში, რომ დაყენებული იყო კონკრეტული ულტიმატუმები, მათ შორის ისეთიც, რომელიც ითვალისწინებდა კანონის უზენაესობის ფეხქვეშ გათელვას", — აღნიშნა კობახიძემ.

მისი თქმით, ოპოზიციური სპექტრის ნაწილი კიევიდან, ექს-პრეზიდენტ მიხეილ სააკაშვილის მხრიდან იმართება:

"ასეთ ვითარებაში, მათ შეთანხმებაზე წამოსვლის არავითარი რესურსი არ ჰქონდათ. ეს იყო მთავარი მიზეზი, რატომაც ჩაშალეს შეთანხმება".

როგორც ქართული ოცნების თავმჯდომარის თქმით, ექვსი პუნქტიდან მხოლოდ ერთი — პარლამენტში შესვლა — უნდა შეესრულებინა ოპოზიციას, დანარჩენი კი მათი გასაკეთებელი იყო.

ოპოზიციისა და მმართველი გუნდის შეხვედრა ევროპული საბჭოს პრეზიდენტის წარმომადგენელთან, კრისტიან დანიელსონთან 10 საათი გაგრძელდა, თუმცა უშედეგოდ დასრულდა — შეთანხმება არ შედგა. დანიელსონის განცხადებით, შეხვედრაზე იყო მნიშვნელოვანი პროგრესი პრეზიდენტ მიშელის დატოვებულ 6-პუნქტიან გეგმის ირგვლივ ზოგიერთ პუნქტზე.

დანიელსონმა აღნიშნა, რომ ხვალ, 19 მარტს საქართველოს დატოვებს და ბრიუსელში დაბრუნდება. მისი თქმით, შარლ მიშელს მოლაპარაკების დეტალებს მოახსენებს.

დანიელსონის შემდეგ ბრიფინგზე ოპოზიციის და მმართველი გუნდის ლიდერები გამოვიდნენ. ამჯერადაც მათ შეთანხმების ვერმიღწევაში ერთმანეთი დაადანაშაულეს. აღსანიშნია ისიც, რომ ოპოზიცია ამ მოვლენების უკან ბიძინა ივანიშვილის ხელს ხედავდა, მმართველი გუნდი კი მიხეილ სააკაშვილისას.

ამავე თემაზე: