ჯანდაცვის მინისტრის, ეკატერინე ტიკარაძის განცხადებით, ვაქცინაციის დაწყების პირველი სამი დღის განმავლობაში აცრილთა რაოდენობასთან დაკავშირებით "მოლოდინი მეტი არ ყოფილა". ტიკარაძის თქმით, ვაქცინაციის გეგმას მიჰყვებიან.

"AstraZeneca-ს მიმართ მიმდინარეობს საკმაოდ აგრესიული ანტიკაპმანია, რომელიც ჩანს, რომ არ იქნება ამოღებული ვაქცინაციის პროცესიდან. ძალიან ბევრი ქვეყანა და მსოფლიო ჯანდაცვის ორგანიზაცია მხარს უჭერს AstraZeneca-თი ვაქცინირებას. რა თქმა უნდა, ეს მოვლენებიც, ასევე, გავლენას ახდენს ჩვენი ექიმების აქტივობაზე.

თუმცა იმ არსებული გეგემის მიხედვით, რომელიც ვაქცინაციის გეგმით არის გაწერილი, ჩვენი მოლოდინი პირველი სამი დღის განმავლობაში არ ყოფილა მეტი და შეიძლება ითქვას, რომ ჩვენ მივყვებით გეგმას. ის რაც ბატონმა ამირანმა ბრძანა, რომ 3 ათასი ადამიანი დღიურ რეჟიმში, რა თქმა უნდა, ეს არის სამიზნე, რაზეც ჩვენ ვმუშაობთ, თუმცა ამ ეტაპისთვის ვერ ვხედავთ საგანგაშო, კრიტიკულ მაჩვენებელს", — თქვა მან.

დაავადებათა კონტროლის ეროვნული ცენტრის დირექტორმა, ამირან გამყრელიძემ 16 მარტს თქვა, რომ დაბალია იმ მედპერსონალის რიცხვი, ვინ კორონავირუსის ვაქცინის გაკეთებისთვის დარეგისტრირდა ან უკვე აიცრა. 15 მარტს საქართველოში კორონავირუსის წინააღმდეგ ვაქცინაცია დაიწყო. დაავადებათა კონტროლის ცენტრის ხელმძღვანელის მოადგილე, პაატა იმნაძე ერთ-ერთი პირველი იყო, ვინც ვაქცინა საჯაროდ გაიკეთა. მის გარდა, აიცრნენ ინფექციური საავადმყოფოს ექიმები, მათ შორის, მარინა ეზუგბაია და მარინა ენდელაძე.

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

გაიგეთ მეტი: