ჯანდაცვის სამინისტროსთან ოკუპირებული აფხაზეთიდან ცენტრალური ხელისუფლების მიერ კონტროლირებად ტერიტორიაზე გადმოსული მოქალაქეებისთვის კარანტინის მოხსნა მოითხოვეს.

აქციის ორგანიზატორის, ელისო ჯანაშიას თქმით, აუცილებელია მთავრობამ დაწესებული სავალდებულო კარანტინი გააუქმოს და ის ენგურის ხიდზე 15-წუთიანი სწრაფი ტესტებით ჩაანაცვლოს.

"ძალიან ბევრი პრობლემა აქვს იქაურ მოსახლეობას, მაგრამ ყველაზე მწვავე არის ის, რომ წელიწადზე მეტია ადამიანები ჩაკეტილები არიან და ელემენტარულ საყოფაცხოვრებო პრობლემებსაც ვერ აგვარებენ. სანამ გაზაფხული და ზაფხული იყო კიდევ არ იგრძნობოდა ეს პრობლემა ასე ძალიან, მაგრამ მთელი ზამთარი მდინარით გადმოცურავდა ხალხი იმისთვის, რომ ელემენტარულად ბანკში მისულიყვნენ ან აფთიაქში წამალი ეყიდათ. მივმართავთ ჯანდაცვის სამინისტროს, რომ გააუქმოს ეს უაზრო კარანტინი, რომელსაც არანაირი საფუძველი არ აქვს", — აღნიშნა მან.

ენგურის ხიდზე გადაადგილება შეზღუდულია და წელიწადზე მეტია ადგილობრივებს ცენტრალური ხელისუფლების მიერ კონტროლირებად ტერიტორიაზე თავისუფლად მიმოსვლის შესაძლებლობა არ აქვთ. გზა საქართველოში Covid-19-ის პირველი შემთხვევის დაფიქსირებისთანავე ოკუპირებული აფხაზეთის დე ფაქტო მთავრობამ ჩაკეტა. ადგილობრივები ამბობენ, რომ აფხაზებთან გარკვეული სახის მოლაპარაკების საფუძველზე ხიდის გადაკვეთის შესაძლებლობა არის, თუმცა ბარიერი საქართველოს მთავრობის მიერ დაწესებული 5-დღიანი სავალდებულო კარანტინია. აღსანიშნავია, რომ საქართველოს სხვა მოქალაქეებისთვის სავალდებულო კარანტინის რეჟიმი არ მოქმედებს.

გაიგეთ მეტი: