დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ზოგადად ანტივაქსერული მოძრაობა მაინც განათლებასთან არის დაკავშირებული.

"სამედიცინო პერსონალის დაბალი აქტიურობა ვაქცინაციის პროცესში ბევრ საკითხს უკავშირდება, ჩვენს სამოქალაქო აქტიურობას, ცოტა სკეპტიციზმს, ალბათ. ეს ანტივაქსერული მოძრაობა, რომელიც ძალიან ძლიერია, სამწუხაროდ, ასევე, ჩვენ კოლეგებშიც საკმაოდ აქვს ფეხი მოკიდებული. მე მაინც ვიტყოდი, რომ ზოგადად, ანტივაქსერული მოძრაობა მაინც დაკავშირებულია ჩვენს განათლებასთან, ამიტომ მეტი სამოქალაქო განათლება, მეტი ცოდნა", — აცხადებს გამყრელიძე.

15 მარტს საქართველოში კორონავირუსის წინააღმდეგ ვაქცინაცია დაიწყო. დაავადებათა კონტროლის ცენტრის ხელმძღვანელის მოადგილე, პაატა იმნაძე ერთ-ერთი პირველი იყო, ვინც ვაქცინა საჯაროდ გაიკეთა. მის გარდა, აიცრნენ ინფექციური საავადმყოფოს ექიმები, მათ შორის, მარინა ეზუგბაია და მარინა ენდელაძე.

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

გაიგეთ მეტი: