ქართული ოცნების დეპუტატი, ლადო კახაძე ძალადობაში ბრალდებულ ნიკოლოზ ბასილაშვილს პარლამენტის ტრიბუნიდან მხარდაჭერას უცახდებს და ამტკიცებს, რომ "გესლი და წინააღმდეგობა" ბასილაშვილში პოტენციალად გარდაიქმნება.

"ნიკოლოზ ბასილაშვილი დაბადებამდე მყავს ნანახი, მუცლად ყოფნის პერიოდში და ნამდვილად არ ვიცოდი, რომ ასეთი დიდი გამაერთიანებელი ენერგიის წყარო იქნებოდა. ვულოცავ მას ამ გამარჯვებას, მის მშობლებს, პირველ რიგში და ყველა იმ ადამიანს, ვინც გულშემატკივრობს.

ახლა მოწინააღმდეგე ბანაკს ვეტყვი, მე ვიცი ხასიათი იმ კაცის, ყოველი თქვენი გარედნ გესლი და წინააღმდეგობა გარდაიქმნება ნიკოლოზ ბასილაშვილში იმ პოტენციალში, რომ რაც მეტს დაუპირისპირდებით, მით მეტ წარმატებას შექმნის. კიდევ ერთხელ ვამბობ, არის ასეთი ორგანო ღვიძლი, რომელიც ყველა შხამს გადახარშავს და ისევ თავისი ორგანიზმის სასიკეთო ენერგიად აქცევს, დიახ, ასეთი ენერგიის მფლობელია ეს კაცი", — თქვა მან.

ნიკოლოზ ბასილაშვილს არასრულწლოვანი შვილის თანდასწრებით ყოფილ ცოლზე ძალადობაში ედება ბრალი. მას თბილისის საქალაქო სასამართლომ 100 ათასი ლარის ოდენობის გირაო შეუფარდა. ამასთან, შემაკავებელი ორდერია გამოცემული როგორც ჩოგბურთელის, ისე მისი მშობლების მიმართ.

პროკურატურის ინფორმაციით, ბასილაშვილმა ყოფილ ცოლს ფიზიკური შეურაცხყოფა 2020 წლის 21 მაისს მიაყენა, მეორე დღეს კი ის დააკავეს. საქმის შესწავლა დაიწყო სახალხო დამცველმაც.

როგორც დაზარალებული ქალი, ნეკა დოროყაშვილი ყვება, სპორტსმენმა მას ფიზიკური დაზიანებები მიაყენა, ხოლო ყოფილი მამამთილი დიდტარიანი საგნით გაეკიდა. მისივე თქმით, დაპირისპირება მაშინ მოხდა, როცა ის შვილის წამოსაყვანად ბასილაშვილის სახლში მივიდა. როგორც ის ამბობს, დაპირისპირების მიზეზი ამ დრომდე არ იცის. დოროყაშვილის განმარტებით, ქონებრივი დავა არ ჰქონიათ, რადგან ეს პროცესი მანამდე დასრულდა მოლაპარაკებით.

სპორტსმენი და მისი ოჯახი ბრალდებებს უარყოფენ. ჩოგბურთელმა განაცხადა, რომ სასამართლოს დასრულებამდე არ აპირებს საჯარო დისკუსიაში შესვლასა და საქმის დეტალებზე საუბარს.

13 მარტს ნიკოლოზ ბასილაშვილმა დოჰას 250-იანი ტურნირის ფინალი მოიგო. მანამდე, 11 მარტს ლეგენდარული ჩოგბურთელი, როჯერ ფედერერი დაამარცხა. დოჰას ტურნირში გამარჯვების შემდეგ, მან შვილს მიმართა და თქვა, რომ ის მისთვის ყველაზე ძვირფასი ადამიანია.