განათლების სამინისტროს ინფორმაციით, ივანე ჯავახიშვილის სახელობის თბილისის სახელმწიფო უნივერსიტეტის ისტორიაში პირველად, სადოქტორო დისერტაცია უსინათლო კანდიდატმა დაიცვა.

გურანდა ჯამათაშვილი 202-ე უსინათლოთა სკოლა - პანსიონის ინგლისური ენის პედაგოგია და შესაბამისად, კარგად იცის პრობლემები, რომელიც უსინათლო ბავშვებს სწავლის პროცესში ექმნებათ. ამ სირთულეების გადაწყვეტის სურვილმა მიიყვანა იგი განათლების მეცნიერებების სადოქტორო პროგრამაზე.

გურანდა ახლა უსინათლო მოსწავლეების პრობლემებზე მუშაობს. ამ პერიოდში ის აქტიურად იყო ჩართული საერთაშორისო და ადგილობრივ სამეცნიერო სემინარებში, კონფერენციებსა თუ, საჯარო შეხვედრებში.

იგი ასევე იყო ინიციატორი უსინათლოთა განათლების საკითხებით დაინტერესებული ქართული თუ, უცხოური არასამთავრობო ორგანიზაციებისა და ადამიანთა ჯგუფების მოზიდვისა უნივერსიტეტში. მოწვეული ექსპერტების მონაწილეობითა და კონსულტირებით, თსუ-ს განათლების მეცნიერებათა დეპარტამენტში მზადდება მასწავლებელთა განათლების პროგრამა უსინათლო ბავშვების სწავლებისთვის.