საქართველოს ენერგეტიკის მინისტრი, კახი კალაძე დეკანოზ გიორგი მამალაძის დაკავებას ეხმაურება. კალაძის თქმით, ყველა დამნაშავე, ვინც გამოიკვეთება, კანონის წინაშე უმკაცრესად იქნება დასჯილი. მისივე განცხადებით, უმძიმესი დანაშაულის პრევენცია მოხდა:

"უმძიმესი დანაშაულის ჩადენა იქნა აცილებული თავიდან. მე ვფიქრობ, რომ კარგად გათვლილი გეგმა იყო და ამის [მაღალი იერარქიის სასულიერო პირის მოწამვლა] განხორციელება იყო ჩაფიქრებული. ეს არ იქნებოდა დარტყმა მხოლოდ და მხოლოდ ეკლესიაზე, მართმადიდებელ მრევლზე, ეს იქნებოდა დარტყმა სრულიად საქართველოზე, ჩვენს ინსტიტუტებზე, შესაბამის სამსახურებზე, ქვეყანაში სიმშვიდესა და მშვიდობაზე, თუმცა ეს ყველაფერი არ გამოუვიდათ. მინდა მადლობა მოვახსენო შესაბამის სამსახურებს საქართველოს უსაფრთხოების სამსახურს, პროკურატურას და დაველოდოთ გამოძიებას."

მთავარი პროკურატურის ცნობით, 2017 წლის 10 თებერვალს, მკვლელობის მომზადების ფაქტზე დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.