ევროპარლამენტარ ვიოლა ფონ კრამონის განცხადებით, როგორც საქართველოსთვის ევროპული პარლამენტის დემოკრატიული მხარდაჭერისა და არჩევნების საკოორდინაციო ჯგუფის წამყვანი წევრი მზად საქართველოს პარლამენტთან და ყველა პარტიასთან ერთად საპარლამენტო მედიაციაში ჩაერთოს. ის, ასევე, მხარეებს პარტიული ინტერესების გვერდზე გადადებისკენ მოუწოდებს.

"ევროპული პარლამენტი საქართველოში არსებული პოლიტიკური კრიზისის გადაჭრაში აქტიურადაა ჩართული. მე სავსებით ვუჭერ მხარს პრეზიდენტ მიშელის წარმომადგენელ კრისტიან დანიელსონის ძალისხმევას მიმდინარე მედიაციაში. მასთან ახლო თანამშრომლობასაც ველოდები.

როგორც საქართველოსთვის ევროპული პარლამენტის დემოკრატიული მხარდაჭერისა და არჩევნების საკოორდინაციო ჯგუფის წამყვანი წევრი მზად ვარ სრულიად ჩავერთო საპარლამენტო მედიაციაში საქართველოს პარლამენტთან და ყველა პარტიასთან ერთად. გადამწყვეტი მნიშვნელობა აქვს თანამშრომლობის და ურთიერთპატივისცემის პოლიტიკური კლიმატის შექმნას, რაც აუცილებელია იმისთვის, რომ ევროპული პარლამენტი ჩაერთოს მედიაციის პროცესში. მოვუწოდებ ყველა პოლიტიკურ პარტიას პარტიული ინტერესები გვერდზე გადადონ, მოლაპარაკებების ცენტრში დააყენონ ქვეყნის მოქალაქეები და თავიან ევროპულ და დემოკრატიულ მისწრაფებებს პატივი სცენ", — აღნიშნავს კრამონი.

ევროპული საბჭოს პრეზიდენტის, შარლ მიშელის პირად წარმომადგენელ კრისტიან დანიელსონთან მმართველი პარტიისა და ოპოზიციის შეხვედრები 14 მარტს უშედეგოდ დასრულდა, რის გამოც შარლ მიშელის წარმომადგენელმა თბილისში ვიზიტი ერთი დღით გადადო.

დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: