ესტონეთის ყოფილი პრეზიდენტი, ტომას ჰენდრიკ ილვესი პრემიერმინისტრ ირაკლი ღარიბაშვილის ბრიუსელში ოფიციალური ვიზიტის დაწყებამდე ტვიტერზე გამოქვეყნებულ პოსტზე წერს, რომ "შესანიშნავი პროგრესი" არ იქნება ის, რაც ევროკავშირისა და NATO-ს წევრ ქვეყნებს პირველი მოუვათ აზრად.

ღარიბაშვილმა ტვიტერზე დაწერა, რომ საქართველოს საბოლოო მიზანი ევროკავშირისა და NATO-ს წევრობაა.

"ჩემი ოფიციალური ვიზიტი ბრიუსელში იწყება. შევხვდებით ბელგიის, ევროკავშირისა და NATO-ს უმაღლეს წარმომადგენლებს. საქართველოს მიერ მიღწეული პროგრესი ნამდვილად შესანიშნავია, რადგან ჩვენ პროგრესის მიღწევას ევროპულ და ევროატლანტიკურ გზაზე ვაგრძელებთ. ჩვენი საბოლოო მიზანია ევროკავშირისა და NATO-ს წევრი გავხდეთ," — აღნიშნა მან.

პრემიერმინისტრი ბრიუსელში დღეს, 15 მარტს გაემგზავრა, სადაც საქართველო-ევროკავშირის ასოცირების საბჭოს მე-6 სხდომაში მიიღებს მონაწილეობას.

ვიზიტის ფარგლებში გაიმართება მაღალი დონის შეხვედრები როგორც ევროკომისიაში, ევროპულ საბჭოსა და ევროპარლამენტში, ასევე — NATO-ში. პირველ შეხვედრას ირაკლი ღარიბაშვილი დღეს ევროპული საბჭოს პრეზიდენტ შარლ მიშელთან გამართავს.

16 მარტს, საქართველო-ევროკავშირის ასოცირების საბჭოს სხდომის შემდეგ, გაიმართება პრემიერ-მინისტრ ირაკლი ღარიბაშვილის, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის ჟოზეფ ბორელის და ევროპული სამეზობლო პოლიტიკისა და გაფართოების საკითხებში ევროკომისარ ოლივერ ვარჰეის ერთობლივი პრესკონფერენცია.

17 მარტს შეხვედრები შედგება ევროპარლამენტსა და ნატოში. საქართველოს მთავრობის მეთაურს ნატოს შტაბბინაში ალიანსის გენერალური მდივანი იენს სტოლტენბერგი უმასპინძლებს. შეხვედრის შემდეგ, ირაკლი ღარიბაშვილის და იენს სტოლტენბერგის ერთობლივი პრესკონფერენცია გაიმართება. ასევე, დაგეგმილია ნატო-საქართველოს კომისიის სხდომა.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.