ევროპული საბჭოს პრეზიდენტი, კრისტიან დანიელსონი ამბობს, რომ ოპოზიციას კარგი შეხვედრა ჰქონდა და შეხვედრების გაგრძელებას აპირებს. ამის შესახებ მან ჟურნალისტებს პრეზიდენტ სალომე ზურაბიშვილთან შეხვედრამდე განუცხადა.

"მაქვს კონკრეტული ამოცანა პრეზიდენტ მიშელისგან დაკისრებული, რომ დავეხმარო მხარეებს მედიაციის პროცესში. მნიშვნელოვანი სამუშაო უკვე ჩატარდა. ჩვენ ვაგრძელებთ მუშაობას და არის სერიოზული საკითხები, რომელიც რჩება გადასაწყვეტი. მნიშვნელოვანია, რომ ახლა მხარეები იყვნენ კონსტრუქციულები, რათა მივაღწიოთ კომპრომისს", — ამბობს დანიელსონი, რომლის განცხადებასაც ფორმულა ავრცელებს.

კრისტიან დანიელსონი ევროპული საბჭოს პრეზიდენტის, შარლ მიშელის პირადი წარმომადგენელია, რომელიც საქართველოში ქართულ ოცნებასა და ოპოზიციას შორის მოლაპარაკებების მედიაციისთვის ჩამოვიდა.

იგი მეოთხე დღეა ხვდება როგორც მმართველი პარტიის, ისე ოპოზიციური პარტიების ლიდერებს. ასევე, შეხვდა არასამთავრობო ორგანიზაციების წარმომადგენლებს.

14 მარტი იყო დანიელსონის ვიზიტის ბოლო დღე საქართველოში, თუმცა, გუშინ, პარტიებთან შეხვედრების შემდეგ მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

დღეს დილით იგი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.