ჯანდაცვის მინისტრის მოადგილის, თამარ გაბუნიას განცხადებით, AstraZeneca-ს ვაქცინასა და თრომბოემბოლიას შორის მიზეზშედეგობრივი კავშირი არ დასტურდება.

"დღეს არანაირი მტკიცებულება, რომელიც დაადასტურებდა მიზეზ-შედეგობრივ კავშირს AstraZeneca-სა და გამოვლენილ მოვლენებს შორის, არ არსებობს და თრომბოემბოლიის რისკი ისეთივეა ვაქცინაციის შემდეგ, როგორც ზოგადად მოსახლეობაში ვაქცინაციის გარეშეც იქნებოდა.

მოგახსენებთ, რომ თრომბოემბოლია ისედაც შესაძლებელია დაკავშირებული იყოს მთელ რიგ დაავადებებთან და ასევე სხვა რისკ-ფაქტორებთან. ამდენად, ჯანმრთელობის მსოფლიო ორგანიზაცია კავშირს AstraZeneca-ს ვაქცინასა და გამოვლენილ მოვლენებს შორის, კონკრეტულად თრომბოემბოლიურ გართულებებზე მაქვს საუბარი, არ ადასტურებს", — განაცხადა გაბუნიამ რუსთავი 2-თან.

დანიამ, ისლანდიამ და ნორვეგიამ ასტრაზენეკას ვაქცინის გამოყენება მას შემდეგ შეაჩერეს, რაც ვაქცინაციიდან რამდენიმე დღის შემდეგ რამდენიმე აცრილს თრომბოემბოლია განუვითარდა და ერთ-ერთი გარდაიცვალა.

ევროკავშირის სამედიცინო სააგენტომ ავსტრიის შემთხვევა განიხილა და განაცხადა, რომ "არანაირი მინიშნება არ არსებობს იმაზე, რომ ეს მდგომარეობა ვაქცინაციამ გამოიწვია. თრომბოემბოლური მოვლენები ვაქცინირებულ ადამიანებში არ არის უფრო მაღალი, ვიდრე ზოგად პოპულაციაში".

საქართველოში ვაქცინაცია AstraZeneca-ს ვაქცინით ხვალ, 15 მარტიდან იწყება. დღეს ცნობილი გახდა, რომ დაავადებათა კონტროლის ეროვნული ცენტრის (NCDC) დირექტორის მოადგილე, პაატა იმნაძე კორონავირუსის საწინააღმდეგო აცრას პირველი გაიკეთებს.

ჯანდაცვის სამინისტროში აცხადებენ, რომ COVID-19-ის საწინააღმდეგო ვაქცინაციის ელექტრონულ სისტემაში ვიზიტი ამ დროისათვის 1 449 მედპერსონალს აქვს დაჯავშნილი. მათივე თქმით, რეგისტრაცია შეუფერხებლად მიმდინარეობს.

AstraZeneca-ს ვაქცინის 43 200 დოზა საქართველოში 13 მარტს ჩამოიტანეს.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

მანვე აღნიშნა, პირველ რიგში აიცრებიან ექიმები და შემდეგ რისკჯგუფები. მისივე თქმით, გადანაწილება თავდაპირველად დიდ ქალაქებში მოხდება.