დაავადებათა კონტროლის ეროვნული ცენტრის (NCDC) დირექტორის მოადგილე, პაატა იმნაძე ხვალ, 15 მარტს კორონავირუსის საწინააღმდეგო აცრას პირველი გაიკეთებს. ამის შესახებ ინფორმაცია On.ge-ს NCDC-ში დაუდასტურეს.

მათივე თქმით, იმნაძე ინფექციურ საავადმყოფოში დილის 9 საათზე, პირდაპირ ეთერში აიცრება.

საქართველოში ვაქცინაცია 15 მარტიდან იწყება. ჯანდაცვის სამინისტროში აცხადებენ, რომ COVID-19-ის საწინააღმდეგო ვაქცინაციის ელექტრონულ სისტემაში ვიზიტი ამ დროისათვის 1 449 მედპერსონალს აქვს დაჯავშნილი. მათივე თქმით, რეგისტრაცია შეუფერხებლად მიმდინარეობს.

AstraZeneca-ს ვაქცინის 43 200 დოზა საქართველოში 13 მარტს ჩამოიტანეს.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

მანვე აღნიშნა, პირველ რიგში აიცრებიან ექიმები და შემდეგ რისკჯგუფები. მისივე თქმით, გადანაწილება თავდაპირველად დიდ ქალაქებში მოხდება.

გაიგეთ მეტი: