საპარლამენტო უმრავლესობის ერთ-ერთი ლიდერის, მიხეილ სარჯველაძის თქმით, ქართულ ოცნებასა და ოპოზიციას შორის მოლაპარაკებების პერსპექტივა მთლიანად დამოკიდებულია ოპოზიციის განწყობასა და კეთილსინდისიერებაზე.

"რაც შეეხება პერსპექტივებს, მოლაპარაკებისას, ეს დიდწილად, არა, ალბათ, მთლიანად დამოკიდებულია ოპოზიციის განწყობაზე და კეთილსინდისიერებაზე, მოსალაპარაკებელ საკითხებთან დაკავშირებით. რამდენად ექნებათ რეალურად განწყობა, რომ მოლაპარაკება შედგეს", — განაცხადა მიხეილ სარჯველაძემ.

გუშინ, 10 მარტს, საპარლამენტო უმრავლესობის ერთ-ერთმა ლიდერმა, ნიკოლოზ სამხარაძემ განაცხადა, რომ მოლაპარაკებების შემდეგი რაუნდი მიმდინარე კვირას გაიმართება.

სავარაუდოდ, ხვალ, 12 მარტს, საქართველოში ჩამოვა ევროპული საბჭოს პრეზიდენტის, შარლ მიშელის პირადი წარმომადგენელი, კრისტიან დანიელსონი, რომელიც მოლაპარაკებების პროცესში მედიატორის როლში ჩაერთვება.

ევროპული საბჭოს განცხადებაში ვკითხულობთ, რომ შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.