ლაგოდეხის დაცული ტერიტორიების ადმინისტრაციის განცხადებით, დღეს მათთან ტყიდან გამოსულ შველზე შეტყობინება შევიდა, რომ ის ლაგოდეხის ქუჩებში გადაადგილდებოდა.

"რეინჯერების მიერ ქ. ლაგოდეხში, ზაქათლის ქუჩაზე ნაპოვნი მამრი შველი გადაყვანილ იქნა ადმინისტრაციაში. სადაც მას ვეტერინარის ზედამხედველობით ჩაუტარდა დათვალიერება და დადგინდა, რომ შველს არ აღენიშნებოდა ცეცხლსასროლი იარაღით მიყენებული დაზიანება" - წერია განცხადებაში.

ლაგოდეხის დაცული ტერიტორიების ადმინისტრაციის ინფორმაციით, შველს რქების მექანიკური დაზიანება აღენიშნებოდა:

"მას დაზიანებული რქებიდან (მოზარდი რქების კანი) სდიოდა სისხლი".

განცხადების თანახმად, ვეტერინარმა შველს პირველადი დახმარება აღმოუჩინა და ჭრილობა დაუმუშავა, თუმცა შველის გადარჩენა ვერ მოხერხდა.

ლაგოდეხის დაცული ტერიტორიების ადმინისტრაცია შველის დაღუპვის სავარაუდო მიზეზად სტრესით გამოწვეულ გულის უკმარისობას ასახელებს.