უშიშარი გოგოს წლევანდელი ინსტალაცია ბიზნეს სამყაროში გენდერული თანასწორობის მიმართულებით პროგრესს უკავშირდება. ქალთა საერთაშორისო დღის აღსანიშნავად უშიშარმა გოგომ "შუშის ჭერი" დაამსხვია. გამოთქმა "შუშის ჭერი“ ყველაზე ხშირად სამუშაო ადგილზე გენდერული დისკრიმიანციის აღსანიშნავად გამოიყენება. ეს ის უხილავი ბარიერია, რომელიც ქალებსა და სხვა მოწყვლად ჯგუფებს პროფესიული წარმატების მიღწევასა და ორგანიზაციებში მაღალი თანამდებობის დაკავებაში უშლის ხელს.

"უშიშარი გოგოს ირგვლივ დამსხვრეული შუშის ჭერის დამონტაჟება ქალების ყოველდღიური მიღწევების სიმბოლოა. 1 486-მა კომპანიამ, რომელსაც მანამდე გადაწყვეტილების მიმღებ საბჭოებში მხოლოდ კაცი წევრები ჰყავდა, ჩვენს მოწოდებას უპასუხა და ახლა საბჭოში, სულ მცირე, ერთი ქალი წევრი ჰყავს", — განაცხადა ინვესტიციების მართვის კომპანია State Street Global Advisors-ის პრეზიდენტმა.

ფოტო: Brendan McDermid / Reuters

2017 წლის 8 მარტს უოლ-სტრიტზე მოქალაქეები უჩვეულო სანახაობის მომსწრენი გახდნენ: უოლ სტრიტის ბრინჯაოს ხარის წინ უშიშარი გოგოს ქანდაკება გამოჩნდა. როგორც მოგვიანებით გაირკვა, უშიშარი გოგოს ქანდაკება ფინანსურ კორპორაციებში გენდერული მრავალფეროვნების არარსებობის გასაპროტესტებლად კომპანია State Street Global Advisors-ის ინიციატივით დაიდგა.

აღსანიშნავია, რომ 2017 წელს კამპანიის ავტორები ინსტალაციის გაგრძელებას მხოლოდ 1 კვირის განმავლობაში აპირებდნენ, თუმცა საზოგადოების მოთხოვნით, უშიშარი გოგო დღეს უოლ-სტრიტის მუდმივი მაცხოვრებელია, რომელიც ქალთა უფლებების მიმართულებით არსებულ პრობლემებს, ალბათ, მომავალშიც საინტერესო ფორმით გამოეხმაურება.