ქართული ოცნების დეპუტატის, სოზარ სუბარის აზრით, TV პირველის მიერ გავრცელებულ ჩანაწერებში, დანაშაულის ნიშნები არ ჩანს. მისი თქმით, დანაშაულია, როცა ადამიანებს უკანონოდ უსმენენ.

"ამ ჩანაწერებში, ჩემი აზრი თუ გაინტერესებთ, ახლა პროკურატურა თავისას იტყვის, მე ვერ ჩავერევი, ჩემი აზრით, მე რასაც ვუსმინე, არ ჩანს არანაირი დანაშაულის ნიშნები. დანაშაულის მკაფიო გამოხატულებაა, როდესაც ადამიანებს უსმენენ, არასრულწლოვანებს უსმენენ უკანონოდ", — თქვა მან.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ჩანაწერების შემდეგ, ბერა ივანიშვილმა 9 მარტს ტელეკომპანია იმედს ინტერვიუ მისცა. მთელი ინტერვიუს განმავლობაში მას ერთხელაც არ უთქვამს, რომ ჩანაწერები ნამდვილი არ არის. მეტიც, აუდიტორიის წინაშე ხმამაღლა განაცხადა, რომ თუ ვინმე დედას შეაგინებს, პასუხს მოსთხოვს. დაადასტურა ბავშვების მშობლებთან მისვლაც, მაგრამ ამტკიცებს, რომ ეს ადამიანები კანონისა და მორალის დაცვით მოინახულეს.

გაიგეთ მეტი: