მობილური ოპერატორები, ჯეოსელი, მაგთი და ბილაინი ფარულ მიყურადებასთან დაკავშირებით, საკანონმდებლო ცვლილებებს ეხმიანებიან და აცხადებენ, რომ მათთვის მიუღებელია ცვლილებების შეტანა კანონში, ავტორიზებული პირების ჩართვის გარეშე.

კომპანია ჯეოსელის განცხადებით, კანონპროექტის ინიცირება ავტორიზებული პირების ჩართულობის და მათი მონაწილეობის გარეშე მიუღებელია:

"ჯეოსელის, როგორც საერთაშორისო ჯგუფის (Telia Company) წარმომადგენლის უმთავრეს ფასეულობას წარმოადგენს ადამიანთა უფლებების, სიტყვის და გამოხატვის თავისუფლების, მოქალაქეთა პირადი ინფორმაციის დაცვის უზრუნველყოფა".

ჯეოსელისთვის აღნიშნული საკანონმდებლო პაკეტი არსებით გავლენას ახდენს კომპანიის, როგორც ელექტრონული კომუნიკაციების სფეროში ავტორიზებული პირის საქმიანობაზე, ვალდებულებებზე, ფინანსურ და ტექნიკურ შესაძლებლობებზე, მათ შორის, ბიზნესის განვითარების სამომავლო გეგმებზეც.

კომპანია მაგთიკომისთვისაც პრობლემურია ის, რომ კანონპროექტის შექმნისას, ავტორიზებული პირები პროცესში ჩართულები არ ყოფილან.

"კანონპროექტის საკითხების მნიშვნელობიდან გამომდინარე, მიუღებლად მიგვაჩნია მისი განხილვა ავტორიზებული პირების მონაწილეობის გარეშე, ვინაიდან კანონპროექტით დაკისრებული მძიმე ვალდებულებების სრულყოფილად აღსრულება შეუძლებელია. სპეც იალისტებით დაკომპლექტებულმა სამუშაო ჯგუფმა უნდა გაითვალისწინოს როგორც სამართლებრივი, ისე ტექნიკური და ფინანსური ასპექტები".

კომპანია ბილაინის (შპს "მობიტელი") განცხადებით, ფარულ მოსმენა-მიყურადღებასთან დაკავშირებით პარლამენტში ინიცირებული კანონპროექტი დასახვეწია და აღნიშნავს რომ არცერთი ავტორიზებული პირი, რომლებსაც უშაულოდ შეეხებათ ასამოქმედებლი კანონპროექტი არ ყოფილან ჩართულები საკანონმდებლო პაკეტის შემუშავებაში.

ბილაინს მიაჩნია, რომ უნდა შეიქმნას სამუშაო ჯგუფი, რომელიც დაკომპლექტდება ყველა დაინტერესებული მხარის წარმომადგენლით და მოხდება საკანონმდებლო ცვლილებებთან დაკავშირებული ყველა საკითხებზე საბოლოო პოზიციების შეჯერება-შეთანხმება .

სატელეფონო და ინტერნეტ კომუნიკაციაზე ფარულ მიყურადებას, ასევე ფარულ ვიდეო და აუდიო გადაღებას განახორციელებს სახელმწიფო უსაფრთხოების სამსახურის (სუს) შემადგენლობაში არსებული უწყება - საჯარო სამართლის იურიდიული პირი (სააგენტო). იგი გუშინ, 30 იანვარს, პარლამენტში სამუშაო ჯგუფის შეხვედრაზე მმართველმა პარტიამ წარადგინა, რასაც ეს შენ გეხებას წარმომადგენლებიც ეწრებოდნენ.