არასამთავრობო ორგანიზაცია Freedom House-ის ანგარიშის თავისუფლება მსოფლიოში 2021 თანახმად, საქართველო ნაწილობრივ თავისუფალია. ორგანიზაციამ 100 ქულიდან საქართველოს 60 მიანიჭა, რაც წინა წელთან შედარებით ერთით ნაკლებია.

"საქართველოში რეგულარული და კონკურენტული არჩევნები ჩატარდა. დემოკრატიული ტრაექტორია უმჯობესდებოდა 2012-13 წლებში მთავრობის ცვლილებასთან ერთად, თუმცა ბოლო წლებში უკუსვლა შეინიშნება. ოლიგარქიული გავლენა მოქმედებს პოლიტიკურ საქმეებზე, პოლიტიკურ გადაწყვეტილებებსა და მედიაგარემოზე, ხოლო პოლარიზაციის გამო კანონის უზენაესობა მორყეულია. სამოქალაქო თავისუფლებების არათანმიმდევრულადაა დაცული", — აღნიშნულია დოკუმენტში.

Freedom Houses-ის ანგარიშში არჩევნებზეც არის საუბარი. ორგანიზაცია არჩევნებზე ხმების მოსყიდვაზე, ძალადობისა და შედეგების დათვლისას აშკარა შეცდომებზე საუბრობს.

პოლიტიკური პლურალიზმის ნაწილში, ორგანიზაცია აღნიშნავს, რომ ქვეყანაში სისტემა მრავალპარტიულია და ახალი პარტიის შექმნისთვის წინაღობები არ არსებობს, თუმცაღა ხაზს უსვამს, რომ 2000-იანი წლებიდან არსებული ერთპარტიული დომინაცია სხვა კონკურენტულ ჯგუფებს განვითარებაში ხელს უშლის.

"2019 წელს მამუკა ერთ-ერთი ყველაზე მსხვილი ბანკის დამფუძნებელმა მამუკა ხაზარაძე და მისი ბიზნესპარტნიორი, ბადრი ჯაფარიძე ფული გათეთრებაში დაადანაშაულეს, ორი კვირის თავზე მას შემდეგ, რაც ხაზარაძემ პოლიტიკური პარტია დააფუძნა. აღნიშნულმა პარტია ლელომ 2020 წლის არჩევნებზე პარლამენტში 4 ადგილი მოიპოვა, თუმცა ხაზარაძის საქმეს ოქტომბერშიც იძიებდნენ", — აღნიშნულია ანგარიშში.

ანგარიშში ვკითხულობ შეფასებებს ქვეყანაში არსებულ კორუფციაზეც. როგორც Freedom House აღნიშნავს, მთავრობაში კორუფცია კვლავ შენარჩუნებულია, რაც ზოგიერთ შემთხვევაში ნეპოტიზმისა ან სახელმწიფო შესყიდვების სახით ვლინდება.

"ანტიკორუფციული კანონისა და აქტების გამოყენების ეფექტურობას ხელს უშლის სამართალდამცავი და სასმართლო ორგანოების არასაკმარისი დამოუკიდებლობა, ხოლო ქართულ ოცნებასთან დაახლოებული მაღალი თანამდებობის პირების წინააღმდეგ წარმატებული საქმეები იშვიათია", — ვკითხულობთ დოკუმენტში.

რაც შეეხება მედიაგარემოს, Freedom House ამბობს, რომ ის პლურალისტური, თუმცა მიკერძოებულია. ამასთან, მაგალითებად მოჰყავს აჭარის მაუწყებლიდან მთავრობის მიმართ კრიტიკულად განწყობილი ჟურნალისტების გათავისუფლება და რუსთავი 2-ის ქიბარ ხალვაშისთვის გადაცემა.

არასამთავრობო ორგანიზაცია აღნიშნავს, რომ შეკრების თავისუფლება ხშირ შემთხვევაში დაცულია, თუმცა ხანდახან პოლიცია გადამეტებულ ძალას იყენებს და ამის მაგალითად ცესკოსთან გამართული დემონსტრაცია მოიყვანა, სადაც მოქალაქეების წინააღმდეგ წყლის ჭავლი გამოიყენეს.

კიდევ ერთი საკითხი, რომელსაც Freedom House ეხება, კანონის უზენაესობაა:

"მიუხედავად განგრძობადი სასამართლო რეფორმებისა, სასამართლოებში აღმასრულებელი და საკანონმდებლო ხელისუფლებების ჩარევა კვლავ სერიოზულ პრობლემად რჩება. პრობლემურია სასამართლო განხილვების მიმართ გამჭვირვალობა და პროფესიონალიზმი".

ანგარიშში საუბარია ანტიდისკრიმინაციულ კანონზე, რომელიც "არათანაბრად გამოიყენება". როგორც ორგანიზაცია აღნიშნავს, ქალები და შშმ პირები სამსახურის ძებნისას კვლავ აწყდებიან დისკრიმინაციას, ხოლო ლგბტ თემის წევრები არიან სოციალური დისკრიმინაციისა და ხშირად ძალადობის მსხვერპლნი. ამასთან, დოკუმენტში ნათქვამია, რომ ტრანსგენდერები ვერ იღებენ საჭირო დაცვას.