საქართველოს ფინანსთა სამინისტროს საგამოძიებო სამსახურმა, სამძებრო და საგამოძიებო მოქმედებების შედეგად, საქართველოს საბაჟო საზღვარზე, ცეცხლსასროლი, სანადირო და პნევმატური იარაღის უკანონოდ გადმოტანის ფაქტი აღმოაჩინა. უწყების პრესსამსახურის ინფორმაციით, განსაკუთრებით დიდი ოდენობით იარაღის გადმოტანისთვის დაკავებულია ერთი მოქალაქე.

"საქმეზე ჩატარებული გამოძიებით დადგენილია, რომ ბრალდებულმა, 2017 წლის 09 თებერვალს, საბაჟო - გამშვები პუნქტი, სარფის გავლით, გადმოკვეთა საქართველოს სახელმწიფო საზღვარი, რა დროსაც, მისი მართვის ქვეშ მყოფ IVECO-ს მარკის ავტომობილით, საბაჟო კონტროლისგან მალულად, საქართველოში გადმოიტანა დეკლარირებას დაქვემდებარებული, განსაკუთრებით დიდი ოდენობით ცეცხლსასროლი იარაღები," - აღნიშნულია უწყების პრესსამსახურის მიერ გავრცელებულ განცხადებაში.

მათივე ინფორმაციით, საგამოძიებო სამსახურმა იარაღი ნივთმტკიცების სახით ამოიღო. საქმეზე გამოძიება მიმდინარეობს საქართველოს სისხლის სამართლის კოდექსის 214-ე მუხლის მე-2 და მე-4 ნაწილით. ამ პუნქტების მიხედვით, საქართველოს საბაჟო საზღვარზე განმეორებით დიდი ოდენობით მოძრავი ნივთის გადატანა ან გადმოტანა, ისჯება ჯარიმით ან თავისუფლების აღკვეთით ვადით ხუთიდან შვიდ წლამდე.

საგამოძიებო სამსახურმა საზღვარზე იარაღის უკანონოდ შემოტანის ფაქტი გამოავლინა