სასამართლომ საფრანგეთის ყოფილი პრეზიდენტი ნიკოლა სარკოზი კორუფციის ბრალდებით გაასამართლა და სამწლიანი პატიმრობა მიუსაჯა. The Guardian-ის ცნობით, აქედან ორი წელი პირობითია. საფრანგეთის ყოფილი პრეზიდენტის სასამართლო გადაწყვეტილების გასაჩივრებას აპირებს.

სარკოზი დამნაშავედ მოსამართლის მოქრთამვის მცდელობაში ცნეს. კერძოდ, მან მის საქმეთან დაკავშირებულ გამოძიებაზე ინფორმაციის სანაცვლოდ მოსამართლეს პრესტიჟული სამსახური შესთავაზა.

ბრიტანული მედიის ინფორმაციით, ნაკლებად სავარაუდოა, რომ ყოფილმა პრეზიდენტმა ციხეში ერთი დღეც გაატაროს. ერთი წლით თავისუფლების აღკვეთა შეიძლება გარკვეული პირობებით, მათ შორის ელექტრონული სამაჯურის ტარებით ან შინაპატიმრობით ჩანაცვლდეს. ამის უფლებას მას მოსამართლის ვერდიქტი აძლევს.

მედია, ასევე, წერს, რომ განაჩენმა, რომელიც პირველ მარტს ნაშუადღევს გამოიტანეს, მომავალ წელს საზოგადოებრივ ცხოვრებაში ჩართვისა და საპრეზიდენტო არჩევნებში მონაწილეობის იმედები სარკოზის დაუმსხვრია.