ქართული ოცნების მაჟორიტარი დეპუტატი, ანზორ ბოლქვაძე უარყოფს, რომ საკუთარ რესტორანში ე.წ. კომენდანტის საათის დროს წვეულება მოაწყო. მისივე მტკიცებით, ვიდეო ერთი წლის წინანდელია.

ვიდეო, სადაც ანზორ ბოლქვაძეცაა დაფიქსირებული, ნაციონალური მოძრაობის ხელვაჩაურის რაიონული ორგანიზაციის თავმჯდომარემ, მიშა ბოლქვაძემ გაავრცელა. როგორც ჩანს, ჩანაწერის ავტორს წვეულებიდან ფეისბუქზე პირდაპირი ეთერი ჰქონდა გაშვებული.

"კომენდანტის საათის დროს ოცნების მაჟორიტარი დეპუტატი ანზორ ბოლქვაძე დახურულ სივრცეში საკუთარ რესტორანში ათეულობით ადამიანთან ერთად ზეიმობს... გუშინ აქციის მონაწილეებს რომლებსაც გაუფუჭდათ ავტომობილი საშვი არ მისცეს გადაადგილების და გაყინეს ქუთაისის მაგისტრალზე... ესაა თქვენი სამართალი", — წერს ოპოზიციის წევრი.

აღნიშნულთან დაკავშირებით On.ge დეპუტატს დაუკავშირდა. ანზორ ბოლქვაძე აცხადებს, რომ ვიდეო მისი შვილიშვილის დაბადების დღეზე, დაახლოებით, ერთი წლის წინ არის გადაღებული.

შეზღუდვების მიუხედავად გამართულ წვეულებებზე მედიაში უკვე დიდი ხანია საუბრობენ. რამდენიმე კვირის წინ ტელეკომპანია ფორმულამ გაავრცელა ინფორმაცია, რომ თბილისის მერის კახა კალაძის ცოლი, ანუკი არეშიძე ქორწილში იყო, მიუხედავად იმისა, რომ ხალხმრავალი ღონისძიებების ჩატარება აკრძალულია.

27 თებერვალს მთავარმა გაავრცელა კიდევ ერთი წვეულების კადრები, ამჯერად დეპუტატ ანტონ ობოლაშვილის სახლიდან. როგორც კადრებიდან ჩანს, ობოლაშვილის დაბადების დღის წვეულებას ქართული ოცნების თავმჯდომარე, ირაკლი კობახიძე და თბილისის მერი, კახა კალაძე ესწრებოდნენ.