პარლამენტის დეპუტატი პატრიოტთა ალიანსის სიით, ემზარ კვიციანი ცილისწამების კრიმინალიზების ინიციატივით გამოდის. ამის შესახებ მან პარლამენტის პლენარულ სხდომაზე განაცხადა. მისი თქმით, ცილისწამების მუხლის დაბრუნებას საზოგადოებაც ითხოვს.

"2005 წელს, ჩვენდა სამწუხაროდ, გაუქმებულ იქნა ცილისწამების მუხლი. რომელიც ჩვენი ქვეყნის მტრებმა და კერძოდ ტერორისტმა სააკაშვილმა გამოიყენა ხალხის საწინააღმდეგოდ. ეს მუხლი და სხვათა შორის ძალიან დიდი გამოხმაურება ამ მუხლზე საზოგადოებაში და ითხოვს საზოგადოება, რომ იქნა აღდგენილი ეს მუხლი."

კვიციანის აზრით, ცილისწამებას გამოხატვის თავისუფლებასთან არაფერი აქვს საერთო:

"რატომ ვართ წინააღმდეგი ამ მუხლის აღდგენაზე ვერ გავიგე. თითქოსდა სიტყვის თავისუფლებას ეწინააღმდეგება. რა საერთო აქვს საერთოდ სიტყვის თვისუფლებას და ცილისწამებას ერთმანეთში? ვისაც არ გამოუცდია ცილისწამება, მე შემიძლია ვთქვა, რომ ღმერთმა არ გამოგაცდევინოთ არავის. დღესაც არ არიან გამოსული სტრესისგან ჩემი შვილები ამ ცილისწამების გამო. არსებობს ბავშვთა უფლებების დამცველები ხო? - ხმას არ იღებენ ამაზე. იქნება შევაჩეროთ ეს უბედურება, რომელიც სხვათა შორის პრობლემა არის მთელი მსოფლიოსთვის."

ამავე მოთხოვნით, 2016 წლის დეკემბერში, იურიდიულ მეცნიერებათა აკადემიამ საკანონმდებლო წინადადებით მიმართა პარლამენტს, რომ ცილისწამება და შეურაცხყოფა კვლავ სისხლის სამართლის წესით დასჯადი გამხდარიყო.

საქართველოში კანონი სიტყვისა და გამოხატვის თავისუფლების შესახებ, ვარდების რევოლუციის შემდეგ, 2004 წელს მიიღეს. სწორედ ამ პერიოდიდან არ შეიძლება პირი დაისაჯოს სისხლის სამართლის წესით ცილისწამებისა და შეურაცხყოფისთვის. მაშინ ეს საკანონმდებლო ცვლილება შეფასდა დემოკრატიულ მონაპოვრად და ადამიანის უფლებების დაცვის კუთხით წინგადადგმულ ნაბიჯად.