საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ განაცხადა, რომ ქვეყანაში არსებული კლინიკების მხოლოდ 15%-ია სახელმწიფოს საკუთრებაში. ხუნდაძე ფიქრობს, რომ ეს არასწორია.

"კოვიდმა გატესტა მთელი სისტემა [ჯანდაცვის] და ჩვენ გარკვეული ცვლილებები, რეფორმები, აქტივობები გვაქვს განსახორციელებელი. ის, რომ სახელმწფო კლინიკების სექტორი უფრო მეტად უნდა გავააქტიუროთ და არ არის საკმარისი ის, რომ ქვეყანაში მხოლოდ 15%-ია სახელმწიფო კლინიკები, დანარჩენი არის კერძო სექტორი, რა თქმა უნდა, ეს არ არის სწორი კონფიგურაცია.

ევროპულ ქვეყნებშიც კი, მაგალითად, გერმანიაში არის 60% სახელმწიფო კლინიკები, ბრიტანეთში 70%, აშშ-ში 80%. ეს არ ნიშნავს იმას, რომ კერძო სექტორის უნდა ზურგი ვაქციოთ, მაგრამ, სწორი სატარიფო პოლიტიკის განხორციელებისათვის აუცილებელია სახელმწიფოს ჰქონდეს თავისი, მყარი, მდგრადი და ურყევი სექტორი", — ამბობს ხუნდაძე.

ეს განცხადება ხუნდაძემ პარლამენტში, მთავრობის ახალი შემადგენლობისთვის ნდობის გამოცხადების საკითხის განხილვისას გააკეთა.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.