ქართული ოცნების დეპუტატის, ლადო კახაძის მტკიცებით, მის ერთ "კითხვას" ქვეყნის შიგნით და გარეთ ბევრი ადამიანი ელოდა. ამიტომ მან პარლამენტში რიგგარეშე სესიის სხდომაზე, სადაც პრემიემინისტრობის კანდიდატს, ირაკლი ღარიბაშვილს უსმენენ, ეს კითხვა დასვა.

კახაძის თქმით, ღარიბაშვილი ის ადამიანია, რომელიც მისი შეკითხვის თემას, საქართველოს სასმელი წყლის რესურსს "გულშემატკივრობს". დეპუტატის განცხადებით, ღარიბაშვილის პირველი პრემიერობის დროს ეს საკითხი "დაძრული" იყო და შემდეგ "გაჩერდა, რატომღაც".

სწორედ ამიტომ, კახაძემ სასმელის წყლის ათვისების პოტენციალზე ისაუბრა და ღარიბაშვილს მიმართა. კახაძე ამტკიცებს, რომ როდესაც მსოფლიოს "სასმელი წყლის" კრიზისი დაუდგება, საქართველო მას "გააჯერებს", შესაბამისად, მსოფლიო "საქართველოს გაუფრთხილდება".

გთავაზობთ მის კითხვას უცვლელად:

ჩემს ამ შეკითხვას ელოდება ძალიან ბევრი ადამიანი, ქვეყნის შიგნით და ქვეყნის გარეთ, მეცნიერები, პრაქტიკოსები. სულ ხუთიოდე წუთის წინ მივიღე კიდევ შეტყობინება, რომ აი, ეს მიაწვდინეთ ხმა იმ კაცს, რომელიც გულშემატკივარია ამ თემის და რომლის პრემიერობის დროს ეს თემა დაძრული იყო, მერე გაჩერდა, რატომღაც. ყველა ქვეყანას აქვს ორი პოტენციალი, ინტელექტუალური და მატერიალური. ყველაზე სწორია, როცა ეს ორი პოტენციალი ერთმანეთს კარგად შეავსებს, კარგად გამოიყენებს ინტელექტი თავის მატერიალურ რესურსს. საქართველოს ინტელექტუალური პოტენციალი ძვირადღირებულია, გონიერი ადამიანებით სავსე გახლავთ ჩვენი ქვეყანა, მაგრამ რესურსები მწირი, ჩემდა სამწუხაროდ. თუმცა ამ რესურსების გონივრული გამოყენება აწარმოე საქართველოს პრინციპიდან, რომელიც თქვენ მიერაა დანერგილი, კარგად იქნა ათვისებული.

ჩვენ გვაქვს ერთი სტრატეგიულზე სტრატეგიული რესურსი, რომლითაც მთელს მსოფლიოს გამოვედრებით. ამ მსოფლიოს, რომელსაც დაუდგება ეს კრიზისი, ჩვენ ამ მსოფლიოს გავაჯერებთ და დავეხმარებით იქით, ეს არის სასმელი წყლის უდიდესი რესუსრი. ბატონო ირაკლი, სასმელი წყლის ინდუსტრია ეს არის ის ქვაკუთხედი, რომელზედაც ის თქვენი შესანიშნავი პრინციპები, რომლებიც ჩამოაყალიბეთ: ახალი ეროვნული იდეოლოგია, ეკონომიკა, სტაბილურობა, დასაქმება, სიღარიბის აღმოფხვრა. მე ძალიან გთხოვთ, რომ ამ პოტენციალის ათვისების სახელმწიფო პროგრამას ჩაუდგეთ სათავეში. თქვენთან ერთად ამ საკითხის ამოწევა წინა პლანზე ჩვენ, როგორც მატერიალური რესურსების შემძენს, ასე უსაფრთხოების და ინტერესის სფეროდ გაგვხდის მთელი მსოფლიოსთვის, ისინი ჩვენ გავიფრთხილდებიან, რამეთუ, ჩვენ იმ წყაროს მივცემთ მათ, რომელიც ასე საჭიროა სასიცოცხლო ფუნქციების შესასრულებლად.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

იმავე დღეს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.