საზოგადოებრივი მაუწყებელი ვებსაიტის შესაცვლელად 135 ათას ლარს იხდის. მაუწყებელმა გამარჯვებული კომპანია - World Wide Web Intelligence ტენდერის საშუალებით შეარჩია და მასთან ხელშეკრულება 2016 წლის 9 დეკემბრს გააფორმა.

არხზე მოსალოდნელი ცვლილებების მიუხედავად, რომელიც რამდენიმე გადაცემის ერთი წლით შეჩერებას გულისხმობს, არ ჩერდება ვებსაიტის პროექტი. მაუწყებლის მედიისა და კომუნიკაციის ბლოკის დირექტორი, თიკო ბერძენიშვილი ამბობს, რომ საზოგადოებრივი მაუწყებელი მიმდინარე წლის ივნისიდან დაიწყებს ახალი ვებსაიტით ოპერირებას.

"გადაწყვეტილება იყო მიღებული, რომ რადგან ვებსაიტზე მუშაობა და განახლება დაწყებული იყო, ის დაიწყებს ოპერირებას. ამას უნდა წამოეწიოს ის [მულტიმედიური] ნიუსრუმის გეგმა, რომელზეც ვსაუბრობთ," - უთხრა თიკო ბერძენიშვილმა On.ge-ს.

ტექნიკური დავალების მიხედვით, საზოგადოებრივი მაუწყებლის ვებსაიტი - public.ge ერთიანი საინფორმაციო პლატფორმა უნდა იყოს, რომელიც გათვლილი იქნება მრავალფეროვან მომხმარებელზე და ინფორმაციის მიღების მრავალ მეთოდზე - კითხვაზე, მოსმენასა და ყურებაზე. ვეებსაიტი ადაპტირებული უნდა იყოს შშმ პირების საჭიროებებზე.

ვებსაიტზე ინფორმაციის მოძიება ოთხი კატეგორიის საშუალებით: რუბრიკების, სპეციალური თემის, საკვანძო სიტყვების ან არხების საშუალებით იქნება. გარდა ამისა, "პერსონალური კედლის" შექმნის შემთხვევაში, ვებსაიტის მომხმარებელს საშუალება ექნება, გაფილტროს მისთვის საინტერესო ინფორმაცია და ყოველ შემდეგ შესვლაზე ნახოს მხოლოდ მისთვის მნიშვნელოვანი ამბები.

"მთავარ გვერდს უნდა ჰქონდეს 1-ზე მეტი (სავარაუდოდ 2) სტრუქტურა - კონტენტის მიწოდების ორი გზა. მომხმარებელთა ერთი ნაწილი დაინახავს ერთს, მეორე - მეორეს. ეს საშუალებას მისცემს ადმინისტრაციას გააანალიზოს რომელი სტრუქტურა ან სტრუქტურის ნაწილი არის ოპტიმალური მომხმარებელთა უმეტესობისთვის," - წერია ტექნიკურ დავალებაში.

ვებსაიტზე ორი ახალი ფუნქცია - საჯარო ინფორმაციის ელექტრონულად გამოთხოვა და მომხმარებლის აზრის მიღების მიზნით გამოკითხვებისა და წერილის მიწერის ფუნქციის დამატება იგეგმება.

იხილეთ საზოგადოებრივი მაუწყებლის ვებსაიტის მაკეტი.