პრემიერმინისტრობის კანდიდატმა, ირაკლი ღარიბაშვილმა განაცხადა, რომ ქართული ოცნება მზადაა დიალოგისთვის ყოველგვარი პირობების გარეშე, ოღონდ, მხოლოდ კონსტრუქციულ ოპოზიციასთან. მისი თქმით, უნდა გაიმიჯნოს ერთმანეთისგან ოპოზიციის კონსტრუქციულად განწყობილი და რადიკალური ფრთები, რომელშიც პრემიერმინისტრობის კანდიდატი ნაციონალურ მოძრაობას გულისხმობს.

"რაც შეეხება ოპოზიციასთან მოლაპარაკების ხედვას, როგორ მესახება მე ოპოზიციასთან მოლაპარაკება. მე ფიქრობ, აქ უნდა გავმიჯნოთ ეს რადიკალური ფრთა კონსტრუქციული და მე როგორც ვიცი, არიან, საბედნიეროდ, კონსტრუქციულად განწყობილი ოპოზიციონერები, რომლებთანაც ჩვენ ყოველთვის გვითქვამს და მინდა გავიმეორო, რომ არასდროს არ გვითქვამს უარი დიალოგზე. ჩვენ ვართ მზად დიალოგისთვის ყოველგვარი პირობების გარეშე.

ჩვენი მიდგომა არის შემდეგი, ყველა იმ კონსტრუქციულად განწყობილ ოპოზიციასთან [დიალოგისთვის ვართ მზად], ვისაც სურს, რომ ამ მძევლობისგან, ამ სიტყვას ვიხმარდი, ამ ძალადობისგან გამოეყოს და მოხდეს მათი დისტანცირება, იმ დესტრუქციული პოლიტიკისგან, რომელიც მომდინარეობს სააკაშვილის და მისი ამ დანიშნული სხვადასხვა კრიმინალებისგან, მელიას ვგულისხმობ, რომელიც, რა თქმა უნდა, კრიმინალია, იმიტომ, რომ სასამართლომ შერაცხა იგი კრიმინალად", — განაცხადა ღარიბაშვილმა.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

გაიგეთ მეტი: