ევროპელი სოციალისტების დეპუტატ ფრიდონ ინჯიას განცხადებით, რადგან ოპოზიციას 31 ოქტომბრის არჩევნების შემსწავლელ დროებითი საგამოძიებო კომისიაში ჩართვა არ სურს, წევრების დაკომპლექტება გაზეთში და ან ტელევიზიაში გაკეთებული განცხადებით უნდა მოხდეს. ინჯიას თქმით, მისი პარტია, თავის მხრივ, დროებითი საგამოძიებო კომისიის მუშაობაში ჩაერთვება.

"მივიღებთ ევროპელი სოციალისტები მონაწილეობას, მაგრამ ოთხივე ხომ ვერ მივიღებთ, ორნი ვიქნებით. ასეთი აზრი მომივიდა, ხომ არ ჯობდა ამ კომისიის საბოლოო ფორმირებამდე ასეთი რამე გაგვეკეთინა, გამოგვეცხადებინა გაზეთში, ტელევიზიაში 20 ან 15 დღის განმავლობაში, ვისაც ექნება სურვილი, მიიღოს მონაწილეობა და დარეგისტრირდებიან. გაივლის ამასობაში დრო და გამოჩნდება, რა უნდათ იმათ [ოპოზიციას]. ჰოდა, ერთი თვის შემდეგ, ნამდვილად გამოჩნდება ხალხი, რომლებსაც უნდათ მიიღონ მონაწილეობა ამ კომისიის მუშაობაში. ისინი, ვინც დასავლეთ საქართველოდან იქნებიან, სასტუმროთი უნდა იყონ უზრუნველყოფილნი. ვიღაც მოიძებნება, დარწმუნებული ვარ ამაში და ვიღაც გაამდიდრებს [კომისიას] და ჩვენ მართალი ვიქნები ხალხის წინაშე", — განაცხადა ინჯიამ საპროცედურო საკითხთა და წესების კომიტეტის სხდომაზე.

ამავე სხდომაზე დღეს 31 ოქტომბრის არჩევნების შემსწავლელი დროებითი საგამოძიებო კომისიის წევრთა რაოდენობა და პროპორციული წარმომადგენლობის კვოტები 4 წევრით განისაზღვრა. აქედან, ფრაქცია ქართულ ოცნებას საგამოძიებო კომისიაში 2 წევრი ეყოლება, უფრაქციო წევრები კი ევროპელი სოციალისტებიდან, ასევე, 2 იქნება.

სხდომაზე აღნიშნეს, რომ, თუკი ოპოზიურ პარტიებს კომისიის მუშაობაში ჩართვის სურვილი გაუჩნდებათ, შეიკრიბებიან და ჩართვის შესაძლებლობას მისცემენ.

31 ოქტომბრის არჩევნების შემსწავლელი დროებითი საგამოძიებო კომისიის შექმნა მას შემდეგ გადაწყდა, რაც ოპოზიციამ შემოდგომაზე ჩატარებულ არჩევნებს უნდობლობა გამოუცხადა და საპარლამენტო მანდატზეც უარი განაცხადა.