ინფექციური საავადმყოფოს დირექტორი, თენგიზ ცერცვაძე საქართველოში კორონავირუსზე ვაქცინაციის დაგვიანებას საერთაშორისო ორგანიზაციებში არსებულ ბიუროკრატიას აბრალებს. მისი თქმით, ბიუროკრატია მხოლოდ საქართველოში არ არის.

"წინასწარი შეთანხმებები როგორც წესი დროში ცოტას იგვიანებს. ეს დიდად მოულოდნელი არ უნდა იყოს. იქ უზარმაზარი ბიუროკრატიაა, მარტო ჩვენთან კი არ არის ბიუროკრატია. იქაც კოვაქსში, საერთაშორისო ორგანიზაციებშიც ბიუროკრატიაა", — განაცხადა ცერცვაძემ საზოგადოებრივ მაუწყებელთან.

მისივე თქმით, კარგი არ არის, რომ საქართველომ ჯერ კორონავირუსზე ვაქცინაცია ვერ დაიწყო, მაგრამ ამბობს, რომ პროგნოზი კეთილსაიმედოა.

საქართველოში Covid-19-ზე ვაქცინა, ჯერჯერობით, არ შემოსულა. პირველი ვაქცინა, რომელიც საქართველოში უნდა შემოვიდეს Pfizer-ია. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზაც შემოვიდოდა. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებს.

გაიგეთ მეტი: