ირაკლი ღარიბაშვილი, რომელიც წლების წინ ბიძინა ივანიშვილმა თავის "ღირსეულ მემკვიდრედ" წარგვიდგინა და თქვა, რომ თავს ახსენებს, მართლა მის გზას მისდევს. "მისაბაძი მაგალითის" მსგავსად პოლიტიკაში ორგზის მოსული ღარიბაშვილი ახლა აპირებს პრემიერის პოსტზე მოვიდეს მეორედ.

გახსოვთ როგორ გვეუბნებოდა ივანიშვილი, რომ ღარიბაშვილი ტიპიური კახელი კაცია, თან "კინგბოქსისტი" და ქვეყანას გამოადგებოდა?! და ის გახსოვთ, ამ ქებას ღარიბაშვილი მადლობების კასკადით რომ პასუხობდა და გვპირდებოდა, "ბატონ ბიძინას" იმედებს არ გავუცრუვებო?

თუ არ გახსვოთ, არ იდარდოთ, ჩვენ გაგახსენებთ. გთავაზობთ მოულოდნელად წასული და მოულოდნელადვე მობრუნებული ღარიბაშვილის იმ ციტატებს, პრემიერობის დროს ომახიანად რომ აცხადებდა და ვირუსულად ვრცელდებოდა. რა თქმა უნდა, ასეთი ბევრია, მაგრამ არჩევანი 10-ზე შევაჩერეთ.

1. "ალო, გამარჯობათ, ირაკლი ვარ ღარიბაშვილი"

რთულია იმის დავიწყება, როგორ სტაცა მაშინდელმა პრემიერმა ხელი ტელეფონს და სტიქიით დაზარალებულს მყისიერი დახმარება და წყნეთში გადაყვანა დაპირდა. ვგონებ არც მას დაავიწყდებოდა, როგორ გაისმა ყურმილში: "ალო, გამარჯობათ, ირაკლი ვარ ღარიბაშვილი".

2. "დიდი მადლობა ბატონ ბიძინას"

რამდენჯერ? შესაძლოა, იქამდე სანამ ხელის გულზე ერბო კვერცხის შეწვას არ გაუთანაბრდება მისი მადლიერება.

3. "როგორც ის ბრძენი კაცი, ბატონი ბიძინა ამბობდა..."

როგორც არ უნდა გრძელდებოდეს ეს ფრაზა, ღარიბაშვილის წარსულის გასახსენებლად საკმარისია, არა? თუმცა მაინც გეტყვით, რომ ასე გრძელდება: "პირველი 2 წელი რთული იქნებოდა და მომავალი წელი იქნება ძალიან კარგი".

ნეტავ "ოცნების" მმართველობის მეცხრე წელსაც იმავე აზრზეა?

4. "ჩვენი ხელისუფლების ყველაზე დიდი შეცდომა იყო ე.წ. კოჰაბიტაცია, მე არ მოვერიდები ამის თქმას"

სადაც ენმ-სთვის ანტიეროვნული ძალის და ათასი კრიტიკული, შეურაცხმყოფელი ეპითეტის დაძახება არ მორიდებია, აქ რატომ უნდა შეეკავებინა თავი?! მგონი, ეს ერთადერთია რაშიც ღარიბაშვილი "ბატონ ბიძინას" არ ეთანხმებოდა.

5."თქვენ არ გსმენიათ, რომ მეუღლის ნათესავი არ არის ნათესავი?"

ამ კახური იუმორით სხდომაზე დეპუტატები კი გაახალისა, მაგრამ ნეტავ ნათესავებთან როგორ "გამოისყიდა" დანაშაული? ამბობენ ტენდერებითო. ეს კითხვაც, რომლის პასუხადაც პრემიერმა "იხუმრა", ნეპოტიზმს ეხებოდა.

6. "ყველა ბავშვებს, ყველა ბავშვს პლანშეტი"

პლანშეტების დარიგების და ბავშვების უმიზეზოდ ჩქმეტის "სამთავრობო პროგრამა" გახსოვთ? არც უნდა დაგვიწყებოდათ.

7. "ჩვენი ვალია, ვიცხოვროთ ისე, როგორც მოეწონებოდა ილია ჭავჭავაძეს"

რა გითხრათ?! რით გაგახაროთ?!

8. "ჩვენც ვართ მზად, ასე ვთქვათ შემოვიჭიროთ ქამრები"

ასე თქვა პრემიერმა ეკონომიკურ კრიზისზე საუბრისას. იმედია, ქამრებიც იმედენლარიანი არ იყო, რამდენიც საათები, ცოდოა გასაფუჭებლად.

9. "ბიძინა ივანიშვილთან დარეკვა და რჩევის კითხვა არის ნორმალური, ჯანსაღი, გამჭვირვალე, ღია პროცესი"

ეჰ, იყო დრო ასე ეგონა, მაგრამ ახლა, როცა ბატონმა ბიძინამ თითის ქნევით დაიბარა აღარ დამირეკოთო, რა ეშველება? ან ჩვენ რა გვეშველება? დრო გვაჩვენებს.

10. "რაც მთავარია, ეს ომი ქართველმა მოიგო და ამიტომ არის უფრო განსაკუთრებული"

დიახ. ეს ფრაზა ნამდვილად მეორე მსოფლიო ომზე თქვა. წერტილი.

ბონუსი: "თანამდებობები არის დროებითი ჩემო ძვირფასებო, მარადიული არის უფალი და სამშობლო"

თქვა და გულში წაიღიღინა — "მშვიდობით არა, ნახვამდის?!"

სწორედ ამ სიტვებით დაგვემშვიდობა ყოფილი პრემიერი, ახლა კი არამარადიულ თანამდებობაზე მეორედ დაბრუნებას გეგმავს.

ავტორის შენიშვნა: სტატიაში ბიძინა ივანიშვილზე ციტატების სიმრავლეზე "პასუხისმგებლობა ეკისრება" ირაკლი ღარიბაშვილს.