არასამთავრობო ორგანიზაციების განცხადებით, ქვეყანაში არსებული მძიმე პოლიტიკური კრიზისის ფონზე, მაშინ როდესაც, დღემდე არ დამდგარა 20 ივნისის აქციის დისპროპორციულად დასჯაზე პასუხისმგებელი პირები და სისხლისსამართლებრივი დევნის დაწყებიდან გასულია 18 თვეზე მეტი, ოპოზიციური ლიდერის მიმართ პატიმრობის ღონისძიების გამოყენება შერჩევით მართლმსაჯულებაზე მიანიშნებს. ასე ეხმაურებიან ისინი თბილისის საქალაქო სასამართლოში ნიკა მელიას აღკვეთის ღონისძიებაზე მსჯელობას.

ხუთი ავტორიტეტული ორგანიზაცია მიიჩნევს, რომ მელიას თავდაპირველი აღკვეთის ღონისძიების ის ნაწილიც, რომელიც საჯარო განცხადებების აკრძალვას გულისხმობდა, გამოხატვის თავისუფლების შეზღუდვა და დეპუტატის უფლებამოსილების განხორციელების არაპროპორციული ხელყოფაა.

NGO-ები განმარტავენ, რომ კანონმდებლობის მიხედვით, აღკვეთის ღონისძიების გამოყენება არ არის თვითმიზანი და ემსახურება კონკრეტული ამოცანების შესრულებას. კერძოდ, ამ ღონისძიების გამოყენება აუცილებელია, თუ არსებობს ბრალდებულის მიმალვის, მტკიცებულებების განადგურების ან/და ახალი დანაშაულის ჩადენის საფრთხე. მათი განცხადებით, აღკვეთის ღონისძიების დარღვევა, პატიმრობის შეფარდების ავტომატური საფუძველი არ უნდა იყოს, მით უფრო, როცა დევნის დაწყებიდან გასულია 18 თვეზე მეტი და გამოძიება დასრულებულია.

არასამთავრობო ორგანიზაციები მიუთითებენ, რომ პროკურატურას ელექტრონული სამაჯურის მოხსნის გამო გაზრდილი გირაოს გადახდის ვადის გასვლიდან თვენახევრის განმავლობაში საქმეზე რეაგირება არ ჰქონია. მათივე თქმით, პარლამენტმა ნიკა მელიას იმუნიტეტი მეორედაც გაუმჭვირვალე პროცესით მოუხსნა.

"ხელმომწერი ორგანიზაციები მოვუწოდებთ საქართველოს პროკურატურას, გაიაზროს საქმეში არსებული გარემოებები, ქვეყანაში მიმდინარე მძიმე პოლიტიკური კონტექსტი და უარი თქვას აღკვეთის ღონისძიების შეცვლაზე. ამასთან, თბილისის საქალაქო სასამართლოს მოვუწოდებთ, დეტალურად იმსჯელოს პატიმრობის შეფარდების საფუძვლებსა და ლეგიტიმურობაზე. ყველაზე დიდი ოპოზიციური პარტიის ლიდერის მიმართ განხორციელებული შერჩევითი დევნა, გამოუსწორებლად აზიანებს ქვეყნის დემოკრატიულ იმიჯს და პოლიტიკური პოლარიზების ფონზე, დესტაბილიზაციის რეალურ რისკს აჩენს. შექმნილ პოლიტიკურ კრიზისზე, პირველ რიგში, პასუხისმგებლობა მმართველ ძალას ეკისრება. ამ დრომდე ხელისუფლების, მათ შორის პროკურატურის მხრიდან გადადგმულმა ნაბიჯებმა მხოლოდ გააღრმავა არსებული კრიზისი. სიტუაციის კიდევ უფრო გამწვავების თავიდან ასაცილებლად მოვუწოდებთ მხარეებს სიმშვიდისა და დემოკრატიის სასარგებლოდ გადაწყვეტილებების მიღებისაკენ", — აცხადებენ ორგანიზაციები.

განცხადება ღიაა ხელმოწერის მსურველი არასამთავრობო ორგანიზაციებისთვის. ამ ეტაპზე კი, ხელს აწერენ:

• ღია საზოგადოების ფონდი (OSGF);
• საერთაშორისო გამჭვირვალობა-საქართველო (TIG);
• საქართველოს დემოკრატიული ინიციატივა (GDI);
• დემოკრატიის კვლევის ინსტიტუტი (DRI);
• დემოკრატიისა და უსაფრთხო განვითარების ინსტიტუტი (IDSD);
• ეკონომიკური პოლიტიკის კვლევის ცენტრი (EPRC);
• ადამიანის უფლებათა ცენტრი (HRC);
• საქართველოს ატლანტიკური საბჭო;
• საფარი;
• ცენტრი ემპათია;
• საზოგადოება და ბანკები;
• სამართლიანი არჩევნებისა და დემოკრატიის საერთაშორისო საზოგადოება (ISFED);
• მმართველობის მონიტორინგის ცენტრი;
• ლიბერალური აკადემია;
• ინფორმაციის თავისუფლების განვითარების ინსტიტუტი (IDFI);
• კვლევითი ჟურნალისტიკისა და ეკონომიკური ანალიზის ცენტრი;
• საქართველოს პენ ცენტრი (PEN Georgia);
• საქართველოს რეფორმების ასოციაცია (GRASS).