ეკონომიკის მინისტრის განცხადებით, მთავრობა კომენდანტის საათის შემსუბუქებაზე, ან გაუქმებაზე ჯერჯერობით მსჯელობა არ არის.

"ერთ-ერთი ყველაზე წონადი ღონისძიება, რაც ჩვენ საბჭოს გადაწყვეტილებით განვახორციელეთ ნოემბერში, როდესაც დავაწესეთ ეს წერტილოვანი შეზღუდვები, იყო სწორედ ეს საათების შეზღუდვა, ღამის საათების შეზღუდვა. მე არ დავარქმევდი ამას კომენდანტის საათს, კომენდანტის საათი გაცილებით უფრო მკაცრი რამ არის, მაგრამ ეს ღამე გადაადგილების შეზღუდვა. სწორედ ამ გადაწყვეტილების და ამ ზომის გამო დღეს ჩვენ შეგვიძლია ვილაპარაკოთ შემსუბუქებაზე. ცალსახად ვთქვათ, რომ ეს იყო ისეთი ამკრძალავი ზომა, რომელმაც სხვა ქვეყნებშიც და მათ შორის, საქართველოშიც მოგვცა პოზიტიური ეფექტი. რა თქმა უნდა, მის შემსუბუქებაზე, ან გაუქმებაზე მსჯელობას წინ ძალიან დიდი ანალიზი უნდა უძღვოდეს იმიტომ, რომ არ შეიძლება ყველაფერი ერთად შევამსუბუქოთ. ჯერჯერობით ამაზე მსჯელობა არ არის, ჩვენ ჯერჯერობით ვმსჯელობთ შემდეგ ნაბიჯებზე", — განაცხადა მინისტრმა.

მანვე განაცხადა, რომ შემდეგ ნაბიჯებში მოიაზრება საბავშვო ბაღების, ფიტნეს ინდუსტრიის, საქალაქთაშორისო ტრანსპორტის გახსნა, ღამის საათების შეზღუდვის შემსუბუქება კი ამის შემდეგ მოიაზრება.