"საათში და 15 წუთში ჩვენი მეგობრის დაბადების დღეა, თუ დარჩებით, ტორტს გაჭმევთ" — ასე განუცხადა გირჩი — მეტი თავისუფლების ლიდერმა, ზურაბ ჯაფარიძემ, შრომის ინსპექციის თანამშრომელს.

ჯაფარიძის ბარში შრომის ინსპექცია ცოტა ხნის წინ მივიდა. მათ განაცხადეს, რომ დაფიქსირდა "არანებადართული ეკონომიკური საქმიანობის" განმეორება, რისი ამსახველი მასალებიც შსს-ს გაეგზავნება.

ზურაბ ჯაფარიძის თქმით, მას შრომის ინსპექციამ ჰკითხა, ეწეოდა თუ არა ეკონომიკურ საქმიანობას, რაზეც ის დაეთანხმა.

"მკითხეს, ისევ ვეწევი თუ არა ეკონომიკურ საქმიანობას, მე ვუთხარი, რომ კი, ბარია ჩემი. მითხრეს, რომ ეს არის აკრძალული და შესაბამისად მასალებს გადაუგზავნიან შინაგან საქმეთა სამინისტროს. ამაზე დავიშალეთ მე და ის ქალბატონი, მეტი არაფერი არ ყოფილა", — განაცხადა ჯაფარიძემ.

მანვე განაცხადა, რომ თუ ბარს დალუქავენ, ის ლუქს გახსნის.

"ჯერ მათ უნდა მიიყვანონ ეს ბოლომდე, უნდა გადაუგზავნონ ეს საქმე პარლამენტს, მათ უნდა შემიჩერონ უფლებამოსილება. ჯერ მათი სვლები არის დარჩენილი კიდევ, მერე გეტყვით მე რას ვაპირებ", — განაცხადა გირჩის ლიდერმა.

ზურაბ ჯაფარიძემ ჯარიმის მიუხედავად დღეს ბარი მაინც გახსნა.

გაიგე მეტი: